Mester a inverti den e poder di compra di e ciudadano sin trabou - *Covid-19 a crea e forma y momento aceptabel pa un pais ta inverti den trabou - *E mensahe mas importante di presupuesto 2021 tabata cu Gobierno ta baha gasto
ORANJESTAD (AAN) — Uno di e temanan favorito den mundo politico ta, trece dilanti cu “Gobierno a inverti den Aruba”. Ta trata aki di un tema sumamente peligroso manera na diferente ocasion den historia a wordo trece dilanti pero tambe a bira e motibo cu na 2018 Aruba mester a tuma medida pa paga tur e loke Gobierno Mike Eman a considera inversion den Aruba.
Durante e reunion di Parlamento di Aruba pa atende cu e cifranan cu Gobierno lo tin pa entrada y gasto na 2021, e punto cu mester a haya tur atencion sigur durante recuperacion di e caida debi na pandemia, ta con e situacion di Aruba refleha den cifranan, ta realmente na e momentonan aki.
Si Aruba na 2017 continuamente tabata tin informacion riba e gastonan y entradanan di Gobierno, Aruba na 2018 lo no a haya su mes ta tuma medidanan pisa di belasting pa asina cubri gastonan cu Aruba no tabata tin placa pa cubri.
Aki mester bolbe na e realidad central di gasta placa di Pueblo, cu ta exigi di un Gobierno responsabel pa no gasta mas placa cu Pueblo tin pa gasta.
Gobierno na tur momento mester actua enfrente e pais manera un cabez responsabel di famia y esaki sigur ta conta pa e forma cu ta gasta placa di Pueblo cu semper ta e fuente di placa di Gobierno pa medio di belasting na un pais democratico.
Durante e tratamento di presupuesto den Parlamento a bini claramente dilanti, cu Gobierno ta baha su gastonan pa yega na e normal cu gastonan di Gobierno mester tin enfrente entrada.
Gasta placa di Pueblo ta mara na ley y na regla, manera semper DIARIO a trece dilanti teniendo duro na e Ley di Contabilidad cu ta duna e base legal pa Gobierno gasta placa di Pueblo.
Mientras Aruba ta habri caminda pa recuperacion, no mester lubida cu na 2020 Aruba a perde tur entrada. Na momento cu e ultimo turista a bandona Aruba y na momento cu establecimentonan mester a cera nan porta, no tabata tin circulacion di placa casi mas na Aruba.
Na momento cu Aruba mester a “lock down” Aruba a tranca su economia loke ta nifica cu Aruba practicamente a pone un fin na su circulacion di placa, cu ta e base pa economia.
No tabata tin trabou mas na Aruba. Empresanan cu mester a duna trabou, mester a cera nan porta y no por a paga empleadonan.
Esaki tabata e momento historico, cu realmente Gobierno mester a habri caha di placa di Pueblo pa directamente hinca placa den Pueblo.
Gobierno di Aruba a habri caha di placa di Pueblo pa empresa haya placa pa paga trahado y pa empresanan tene nan porta habri. Esaki a haci cu ciudadanonan di Aruba, sin cu nan por a traha, a keda cu un entrada cu empresanan no por a paga.
Gobierno Wever-Croes a haya su mes den un situacion cu e mester a duna personanan cu no por a come, asistencia pa nan por alimenta nan mes.
Na e momento cu esaki a sosode, Gobierno Wever-Croes a scapa e situacion social di Aruba, cu a haci cu e trahador a keda cu un entrada ya cu empresanan por a sigui paga pa nan gastonan basico y asina a evita cu na Camara di Comercio lo a topa filanan di empresa cu a cera nan negoshi.
Gobierno Wever-Croes na 2021 pues mester a inverti placa di Aruba pa tene Florin den circulacion loke asina a haci cu awe poco poco por mira economia recupera pa Aruba bolbe na normalidad.
Ta esaki ta e motibo tambe cu instancianan manera IMF, a aplaudi Gobernacion Wever-Croes cu a uza placa den caha di Aruba directamente pa permiti Florin lora y asina mantene Florin, economia y ciudadanonan na bida!
