Universidad di Aruba a duna bon bini na 281 studiante nobo
ORANJESTAD (AAN): E aña academico nobo di Universidad di Aruba (UA) a habri y den un entrevista rector di UA Prof. Dr Viola Heutger a duna di conoce cu e aña aki e Universidad ta celebra 35 aña ta sirbi comunidad y ta educa studiantenan.
“Pa nos esaki ta un momento hopi special y nos ta wak bek yena cu orguyo con nos graduadonan tin un impacto den e comunidad di Aruba, cu bon conexionnan den e region localmente y internacionalmente, segun Heutger, kende a sigui bisa cu esaki ta nifica hopi pa UA.
El a splica cu den e ultimo aña academico un panel Hulandes di acreditacion a duna un recomendacion positivo di acreditacion pa loke ta e programa di Bachelor di OGM.
“Nos a cuminza tambe dos programa Masters nobo, mientras cu pa prome biaha den historia nos tin e asina yama ‘Kingdom Mobility Program’, via cual e prome studiantenan a bay studia 4 luna na Hanze Hogeschool na Groningen, cu ta nos partner, segun e rector.
“Nos ta akinan pa sirbi comunidad y nos ta tambe yena di creatividad y innovacion y pesey algun aña pasa nos a funda nos asina yama ‘Academic Foundation Year’ cu ta un programa pre- Bachelor unda cu studiantenan por evalua y tuma un decision riba kico nan kier haci den futuro, pues tambe pensa riba kico nan kier studia”.
Esaki segun Heutger, kende a indica cu e studiantenan por sigui nan estudio akinan, of den exterior, unda cu tin caba studiantenan di Aruba na Canada, Hulanda, Merca y te hasta na Zuid America.
“Semper nos ta explora opcionnan nobo y nos ta contento pa anuncia cu otro aña nos ta bay tin facilidadnan nobo”, segun e rector cu Universidad di Aruba e aña aki a duna bon bini na 281 studiante nobo.
