Guardacosta seleccionando gruponan nobo di hoben pa bay haya training cu nan

 ORANJESTAD (AAN): Bao di e mirada atento y guia di instructornan di e Formacion Basico di Kustwacht (BOK),

e ultimo dianan tabatin rondanan di seleccion di e aspirantnan nobo pa Guardacosta di Caribe Hulandes pa e islanan di Aruba, Curacao, y St. Maarten.

   Un grupo grandi di hoben entre 18 y 25 aña di edad a mustra interes den e Formacion Basico di Guardacosta cu e aña aki lo cuminza na Augustus 2021.  Durante e rondanan di seleccion, e hobennan a wordo someti na testnan cu ehercicio di forza, resistencia, landamento, y otro tarea di deporte pa asina determina nan estado fisico.

   E hobennan cu ta tanto masculino y femenino, a cuminza e mainta trempan cu e parti di landamento, sigui pa un parti di cada duro, y tambe flex nan curpa.  Como tarea final nan por a haci un tarea den team, y esaki ta un parti importante mirando cu nan lo tin di traha como un team riba e unidadnan di lama di Guardacosta.

   Tur e tareanan deportivo y di team ta wordo haci bao direccion y supervision di e instructornan di BOK, cu a selecciona e mihor hobennan pa asina nan por sigui cu e formacion.

   E reclutamento pa e siguiente curso di formacion pa Guardacosta lo cuminza na Januari 2022.