Autoridadnan na Merca na alerta: * Variante Delta tin e veld medico preocupa
ORANJESTAD (AAN): E director general di sanidad di Merca Vivek Murthy a alerta diaranson den un entrevista cu CNN riba e peliger cu ta existi na e momentonan aki pa esnan cu no a vacuna contra Covid-19.
El a bisa cu esnan cu ainda no ta vacuna tin un risico mas grandi segun mas variantenan ta desaroya. El a referi specificamente na e variantenan B1.617.2 of e variante Delta, identifica pa prome biaha na India.
E noticia riba e variante Delta ta un evidencia di pakico ta asina importante pa vacuna mas lihe posibel, asina Murthy a bisa y a agrega cu esaki ta mas transmisibel y potencialmente mas peligroso.
E preocupacion pa e risico di variantenan cu ta pone fin na un reapertura na nivel nacional na Merca ta comparti pa hopi experto y funcionarionan den e veld di salud.
Dr. Anthony Fauci, director di e Instituto Nacional di Alergianan y Malesanan Infeccioso a señala tambe den un entrevista cu CNN cu Reino Uni a wordo afecta anteriormente pa e variante B.1.1.7, of Alfa, prome cu e infeccionnan Delta a bira predominante.
Nan no kier pa na Merca sosode loke ta sosodiendo na Reino Uni, unda tin un variante problematico cu esencialmente ta bira e variante dominante, locual a pone cu esaki a bira un situacion hopi dificil na Reino Uni.
Fauci a agrega cu e variante Delta ta representa mas di 6 % di e virus den secuencia na Merca.
Aunke na Merca un mayoria grandi di e poblacion a vacuna caba, no kier canta victoria. E tasanan di vacunacion na henter e pais ainda ta desigual.
Murthy a bisa CNN cu e bon noticia ta cu ora cu a observa e vacuna Pfizer, a descubri cu e ta bastante eficaz despues di e di dos dosis pa proteha incluso contra e variante Delta.
