Guardacosta a intercepta boto cu 33 ilegal tratando di drenta Curacao

ORANJESTAD (AAN): Tabata Dialuna anochi personal di Guardacosta di Caribe Hulandes a detecta un boto sospechoso moviendo den awanan teritorial di Curacao. 

Mesora e Rescue and Coordination Center (RCC) a manda un unidad di Guardacosta den e direccion ey.

    Guardacosta a mobiliza den nan speedboat tipo Metal Shark y a bin topa cu e boto sospechoso.  Ta trata di un boto tipo peñero cu dos motor Yamaha outboard.  Abordo tabatin 33 persona ilegal riba dje, di cual 11 ta muher y 22 ta homber abordo.

   Guardacosta a keda sorprendi pa mira asina hopi hende den e boto chikito ey.  Na final nan a pone nan tur hisa man den halto (‘hands up’) y a lastra e boto bay cune na e Pier na Curacao, unda un Team Multidisciplinario consistiendo di miembronan di Guardacosta, GMN, y Polis di Curacao a controla nan tur.

   Abordo di e boto a bin descubri algun animal exotico tambe, di cual uno ta tortuga, un macaco, y cinco prikichi.

   Despues di e control, tur 33 persona indocumenta a ser pasa na Polis di Curacao, y e animalnan exotico a ser pasa na Servicio Veterinario di Curacao.