Grupo grandi di alumno di Colegio EPI a sali pa Europa

Intercambio educacional via Erasmus+

ORANJESTAD (AAN): Den fin di siman cu a pasa, un grupo grandi di Colegio EPI a subi avion rumbo pa Europa, pa participa den un intercambio educacional, danki na e fondo- y guia di Erasmus+.

   Erasmus+ ta e programa mas importante di Union Europeo pa funda programanan pa educacion, training, hubentud, y deporte.  El a wordo lanta cu e meta pa sostene y empuha desaroyo personal y profesional via di mobilidad internacional.  E ta yuda studiantenan y tambe docentenan, haci viahenan boluntario den exterior pa promove inclusion social, y mucho mas.

   Esaki ta algo cu esnan di Colegio EPI lo bay participa na dje na Europa.  Prome cu nan salida di Aruba, Ministro di Enseñanza Gerlien Croes tabata presente pa asina duna cada uno mensahe di bon viahe, y a mustra nan pa probecha di e oportunidad aki pa nan sigui desaroya nan mes lo mas posibel.