Edwina Werleman di Stichting Musica a splica:
ORANJESTAD (AAN): Diasabra awo 31 di januari ta tuma luga e Festival di Aruba Soca Monarch 2026. Pa bon marcha di e evento durante e anochi aki, Señora Edwina Werleman di Stichting Musica a splica detayadamente tocante stoel den e evento. El a remarca cu nunca Stichting Musica a exclui of prohibi stoel riba su mes pero semper a respeta y a adapta na e reglanan existente pa hopi aña caba pa por organiza e festival aki. E reglanan aki ta procede di entre otro Brandweer y KPA y tin di haber primeramente na siguridad di tur cu ta asisti na e festival.
Despues cu Stichting Musica a introduci su mesun reglanan pa permiti stoel den e luga di evento, nan a describi kico e reglanan ta contene y ki tipo di stoel por trece, entre otro, no por drenta cu stoel di hero, di palo, stoel di sala, di patio. Si por drenta cu ‘beach chair’, cu no tin mucho peso y e por dobla. Segun señora Werleman, e motibo di esaki tin di haber solamente cu siguridad, cu ta na prome luga.
El a agrega cu na porta, esnan cu ta trece beach chair, ta wordo indica un area special destina pa esaki segun e plan logistico di organizacion na unda por sinta comodo y cu un bon bista pa wak e festival sin wordo stroba y sin stroba ningun hende di goza di henter e festival. Tampoco ta permiti e stoelnan aki den otro area di e festival. Esaki, señora Werleman a remarca, ta e area cu KPA y Brandweer a aproba y cu SMAC tambe a adapta pa nan eventonan.
