Grupo di dama profesional lo crea un programa “ridiculamente fabuloso” pa celebra e ser femenino

Joase-Ann van der Biest ta splica:

 *Durante henter luna di Maart 

ORANJESTAD (AAN) – Na Frida Khalo Gallery, ubica na Maggy’s den Caya Grandi, a tuma lugar un conferencia di prensa extraordinario, esta “Uniting Women Press Conference”, relaciona cu e Dia Internacional y Luna di Hende Muher, cu lo worde celebra na Maart proximo.

E prome dama na hiba palabra ta Joase-Ann van der Biest, creador di e programa “Muher Fabulosa”  y “Empower Women”, cu ta uni su mes pa celebra Dia Internacional di Hende Muher, pero durante henter e Luna di Maart.

El a señala cu nan ta un grupo di profesional creativo, entre otro “Live coacher”. “Women empower coach”. Nan ta damanan cu a mira e necesidad pa introduci pa prome biaha e “Women Month, uniting women. Nan ta haya hopi importante pa celebra e Dia Internacional di Hende Muher, no solamente un dia,  pero uni forza y a crea un programa “ridiculamente fabuloso” y asina comparti nan conocemento, compasion, amor y creatividad pero tambe duna hende muher di Aruba, e oportunidad pa crea un tas di herment cu durante henter un luna por crea habitonan nobo, un vision nobo, yena nan metanan di nobo, y sigui e resto di aña cu esaki.

E intencion ta pa nan yega mas cerca di e hende muher eyfo, cu no ta haya oportunidad di wordo alimenta cu tur loke e grupo aki ta ofrece.

El a reitera cu e programa ta dura henter un luna, y por scoge pa participa den un sesion of mas cu uno. Por scoge pa sesionnan multiple of pa un siman. “E intencion ta pa yega mas cerca di e ser femenino, e hende muher empodera, e muher cu kier logra su metanan, y yuda di e miho manera cu nos por” Joase-Ann van der Biest a expresa.

El a agrega cu den su caso e lo ta cu e podcast Muher Fabulosa en bibo, unda cu hunto cu e audiencia y un panel di profesionalnan, di hendenan muher cu historianan real lo comparti, via e podcast, en bibo cu e hendenan muher di Aruba cu mester di un tiki mas inspiracion; cu kier conta nan historia y wak den ki forma, hunto, den e sesion aki, nan por yega na un solucion, of por contribui na algo mas bunita, y asina aki nan bay cas inspira, educa cu algo nobo.