Thomas Bach kende ta President di IOC lo bishita Aruba pa dos dia

E lo inaugura edificio nobo di Comite Olimpico Arubano

ORANJESTAD (AAN): Comite Olympico Arubano a indica cu Diamars, e president di International Olympic Committee (IOC) a bandona Suiza rumbo pa un bishita oficial na islanan den Caribe.

   Wanda Broeksema kende ta e actual President di Comite Olimpico Arubano (COA) a ofrece e grato noticia, cu desde 28 di Februari 2023 te cu 11 di Maart, e cabezante di e organizacion olimpico lo ta haciendo bishita na 7 isla en total.

   Y riba Diabierna 10 di Maart 2023, e lo ta na Aruba pa un bishita oficial cu lo dura dos dia.

   Ta despues di 35 aña cu un president di International Olympic Committee lo ta bishitando Aruba atrobe.  E ultimo biaha tabata na 1988 tempo cu e spaño Juan Antonio Samaranch tabata ocupa e puesto ey.  Samaranch a actua como president di IOC desde 1980 te cu 2001.

   Pa Comite Olimpico Arubano, e bishita aki di Thomas Bach ta uno hopi importante, pasobra e Comite local por bay mustr’e, kico ta haciendo cu e fondonan cu ta ricibi no solamente di Panam Sports, pero tambe di Olympic Solidarity.

   Segun Broeksema, President Thomas Bach lo no ta viahando su so, e lo ta cu un delegacion.  Parti di e delegacion ta consisti di Nevel Ilic (president di Panam Sports), y tambe James McCloud (president di Olympic Solidarity), tur dos cu ta suministra fondo no djis pa Comite Olimpico Arubano, pero pa e federacion- y atletanan.

   Aki Wanda Broeksema di Comite Olimpico Arubano a splica cu e lo bay ta un bishita di dos dia hopi extenso.  E lo ta yegando Diabierna atardi, y lo bay ta haciendo bishita na Gobernador Boekhoudt, Ministro di Deporte, y tambe Prome Ministro.

   Despues lo bay tin un ‘Business Connect’ unda President Bach lo por topa comunidad comercial y e lo duna un discurso cu por inspira comercio di con deporte ta asina importante na Aruba, y di con mester inverti tambe den atletanan.

   Diasabra dia 11 di Maart 2023, Comite Olimpico Arubano lo bay inaugura nan oficina completamente nobo, cu e renchinan, y tur loke ta trata loke e oficina nobo ta bay ofrece no djis pa e comision, sino pa e federacionnan y atletanan y Aruba en general.

   Hopi orguyoso di e bishita: Segun Nicole Hoevertsz, Secretaria General di COA, el a bisa cu nan ta extremadamente hopi orguyoso pa cu e bishita cu Thomas Bach ta haciendo otro siman na Aruba, y esey pa varios motibo.  Uno di nan ta cu ta bay haci bishita na diferente gobernante, y tambe Conseho di Ministro, pa asina conta e Ministronan tambe pakico deporte ta asina importante, y pakico e bishita di dirigentenan aki ta importante.

   E anochi di actividad, ta destina pa conecta e mundo di deporte cu e mundo empresarial.

   Diasabra mainta lo bay ta grandi pa Comite Olimpico Arubano ora nan lo inaugura e Fase #1 di nan oficina nobo den Vondellaan.  Esaki ta un soño cu a bira realidad despues di hopi aña.  A traha hopi duro y danki na apoyo financiero di IOC, Panam Sports, y Olympic Solidarity, Fundacion Lotto pa Deporte, Gobierno, y Comite Olimpico Arubano mes e proyecto a bira posible.

   Ainda tin un pida cu tin di keda cla, pero pa Diabierna otro siman e lo tey full.

   Paden lo bay tin un muraya di tur e atletanan olimpico, un muraya di e weganan anterior unda ta mira potret di delegacion y atletanan.  Un momento special ora di mira delegacion di Aruba haci entrada den e Ceremonia di Apertura.  Lo bay tin un camber dedica completamente na un galeria na e uniform deportivo di COA cu ta un elemento asina importante pa e organizacion.

   Lo bay tin un pasiyo dedica na e columna vertebral di e organizacion, cu ta e parti tecnico di deporte, apoyando e federacionnan y cu ta duna sosten na e deportistanan y entrenadornan.  Lo tin tambe dos muraya, uno na e estrellanan di awe, y un muraya dedica na e futuro di deporte.

   Hoevertsz a bisa cu unavez cu keda cla cu Fase #1, lo bay cu apoyo financiero pa e Fase #2 cu ta encera un Museo Olimpico pa Aruba, unda lo invita scolnan pa bay eynan, cu ta unda nan lo duna charla, workshops, tene reunion, pa percura pe henter Aruba cera conoce cu e mundo di deporte y su balor.

   Si bo mira e edificio aki, dilanti tambe tin un piso shinishi, pero na final e lo bay ta full un piso colorido, yen veld deportivo, y ambiente mester ta cu esaki ta e cas olimpico y cas di deporte di Aruba, y tur hende mester sinti nan mes bon bini pa bishita.

   E artista local Paul Wong ta encarga pa pinta e muraya cu ta forma parti di e edificio cu ta cara pa Alfred de Mussetstraat, cu ta haciendo esaki full dedica na deporte.

   Paden lo bay tin un muraya dedica na pictograms, cu ta na encargo di Robby Solognier.  Lo bay tin algun obra di arte na encargo di Timothy Charles.  Pues arte y deporte ta uniendo den e edificio aki, y esey nan ta kere ta hopi importante.

   Despues di inauguracion, lo bay tin un encuentro cu staf di Comite Olimpico Arubano pa nan conta e bishitantenan kico nan a logra, kico ta e futuro, y e retonan cu COA semper ta enfrenta den deporte.

   Diasabra merdia lo bishita un proyecto di Deporte, unda Aruba Doet lo ta activo e momento ey.  Ta bay demostra con importante boluntarionan ta pa deporte y den e caso aki, pa drecha un proyecto deportivo.

   “Esaki ta manera un Bishita Real chikito,” Hoevertsz a categoriza e bishita di e delegacion di International Olympic Committee.