DIARIO a prepara Aruba pa e aumentonan di prijs cu por spera
*Recesion ta keda un incertidumbre grandi na tur parti di mundo
*Pa evita caida di benta hopi prijs ainda no a conoce un aumento
ORANJESTAD(AAN)—Awe e advertencianan cu DIARIO a lanza na caminda pa 2023 a bolbe demostra nan validez ora e aumento di “schoolgeld” y e contribucion pa airconditioning na schoolnan a wordo aumenta.
E aumento di prijs di school, ta un indicacion pa loke ta spera riba tur tereno rond mundo, cu a mira con gobernantenan di paisnan liber a pone un pleister riba e herida cu tabata causa inflacion.
Ta e accion gubernamental rond mundo te awor a evita cu aparentemente e situacion cu ta causa aumento di prijsnan, no a culmina den un recesion, nucleo di problemanan economico extremo pa mundo.
Ora ta papia di inflacion, di aumento di prijsnan a base di situacion cu ta presenta, mester tene cierto realidad na bista.
E motibonan cu ta causa e aumento di prijsnan, e loke ta tene e prijsnan halto y sumanan cu cual prijsnan ta subi.
Na 2022 mundo a haya un experencia grandi di loke inflacion ta encera ora e Guera na Ukraine a manda e prijs di petroleo halto.
Prijs di petroleo ta sumamente importante den calculacion di prijs cu ta haci pa bende un producto.
Un compania, un school, un pais cu traha a base di perdida mester cera su portanan mientras un persona cu pensa cu e por biba a base di perdida (mas gasto cu entrada) ta conoce finalmente e situacion di bancarota.
Normalidad ta exigi pa entrada ta mas halto cu gasta pasobra si no tin entrada, no tin placa pa paga gasto.
Na 2023 tur gasto a subi pasobra prijs di petroleo a subi. Pero no ta solamente prijs di petroleo ta dicidi pa aumento di un producto.
E impacto di petroleo, cu mester pa produccion, ta loke ta aumenta prijs di productonan y servicio.
Aunke nunca por deshaci di abuso cu un grupo bobo por practica, tur hende cu ta haci uzo di su cabez, lo evita abuso pa e simpel motibo cu e aumento di prijs di un producto ta haci e producto of servicio mas dificil pa bende.
Ora un producto bira mas dificil pa bende, entrada ta bay atras, placa pa paga debe y personal ta bira menos cu tur resultado.
E prome impacto di recesion ta hopi bez mas fuerte. E ta un atake frontal riba e poder di compra y medidanan mester wordo tuma pa evita cu e ta kibra un negoshi den cualkier sector.
Den comercio mes, den situacionnan hopi dificil, ta normal cu ta baha e prijs cu ta nifica baha entrada di un negoshi, pa e negoshi por keda cu benta y sigui existi.
Gobierno tambe ta tuma medida y ta medidanan di tur Gobierno di paisnan liber na mundo a haci cu inflacion a baha na 2022 pero na 2023 inflacion na hopi pais, a bolbe subi.
E medidanan cu gobiernonan a tuma na 2022 a evita cu mundo a cay den culminacion di aumento di prijs, cu ta recesion, cu ta caida di e sistema cu ta produci placa y di e sistema cu ta sostene e sistema financiero, economico y monetario di un pais.
E motibo cu prijsnan a subi na 2023, ainda no a desaparece. Guera no a termina na Ukraine pero en cambio, guera ta mas intenso cu nunca na Ukraine.
E motibo pa inflacion a keda. Expertonan mundial ta sigui vigila tur desaroyo.
Na Europa practicamente a deshaci di e peliger pa recesion (si no surgi ningun desaroyo imprevisto).
Na Merca ta papia di e posibilidad cu recesion lo presenta na segundo parti di 2023.
Mientrastanto e peso di prijs ta continua. Mester tuma medida cu ta encera entre otro baha gasto, te caminda cu por baha gasto.
Si no por baha gasto mas, mester subi prijs.
Ta bon pa tene na bista cu si por ehempel prijs di petroleo baha awe, esaki no ta nifica cu tur prijs ta baha awe na Aruba pasobra mester mira e prijs cu a paga pa por tin e azeta awe na cas.
Schoolnan ta aumenta nan prijs. Por spera mas aumento di prijs na 2023, cu lo ta dificil pa un mundo, cu mester di paz pa e por regresa na bienestar di tur hende.
2022 y 2023 sigur mester sirbi como ehempel pakico semper mester biba prepara, pa loke por presenta, loke ta e formula tambe pa papia di responsabilidad!
