Prome Arubiano cu e profesion aki:
ORANJESTAD (AAN) – E siman aki, Dia 7 di Februari pa ta exacto, e maestro Bartholomeus (Roy) Sneek a cumpli 30 aña di a ricibi su diploma di “Piano Tuning- Regulation and Repairing”, na Museun of the American Piano na New York, cual a tuma seis luna largo.
Dia 11 di Februari 1992, maestro Sneek a bishita DIARIO, hopi orguyoso y contento di su logro, cu a tuma hopi sacrificio di su persona y su famia, y den DIARIO, señor Juby Naar a haci un bunita entrevista cune. Juby a remarca cu señor Sneek ta e prome Arubiano cu Licencia di piano-tecnico na Museum of the American Piano.
30 Aña di Trayectoria:
“Tabata tin un recital di piano di Armand Simon, na Cas di Cultura na unda a bin varios pianista grandi for di exterior. E tabata un siman largo anto mi tabata sinta full patras, den Cas di Cultura. Un biaha a resulta un problema, anto Armand a subi riba stage puntra pa e ‘piano docter’ subi riba escenario.
No a tuma ni cinco minuut pa resolve e problema, anto e publico a cuminza aplaudi, y Armand y varios di e pianistanan a puntra mi na unda mi a siña e profesion aki”, maestro Sneek a comenta.
Otro actividad grandi tabata e epoca di oro, na unda e maestro a afina tres piano di cola riba stage, pa e pianistanan grandi señor Moron di Bonaire, señor Dominico Herrera di Corsow y nos Tata di Cultura Padu Lampe.
“Anto e ultimo pieza tabata ABO SO, toca pa tur tres pianista. Cu Herrera mi tabata tin un contacto basta estrecho, pasobra ora mi tabata bay Corsow, kedando na Holiday Inn, unda e tabata e pianista, e tabata yama su señora y bise ‘mami, trece e guitara y cuarta pa mi pasobra señor Sneek ta bay afina mi piano, y nos ta bay jam awenochi’. Ora cu e mes a bin Aruba pa toca, e tabata yama mi pa bin afina e piano cu e tabata bay toca riba stage. Mi a afina pa jazz concert pa Americanonan. Tambe pa crusero cu ta yega Aruba y te ainda mi ta hacie. E problema grandi cu crusero ta cu nan ta yama un of dos dia prome cu e barco drenta, pa mi bay mainta trempan.
E compania concerni, ta yama mi pa por haci e trabao pero mi ta haci diferente pregunta, pasobra nan ta pidi pa afinacion so, pero hopi biaha tin mas problema cu e piano. Mayoria di e barconan ey tin piano di cola, cuater, cinco of seis, y pa cada piano e ta tuma mi un ora y mei. Si conta tur e oranan ey, pa 3 or mi tin cu baha di e barco caba, pasobra e ta sali pa 4 or p.m. Tur hende por compronde cu ta den un rush mi ta, y mi no a haci ni un trabao di ahustacion, regulacion, reemplazo, reparacion. Y tur esaki ta resulta hopi biaha cu den e barco mi ta haya sa, pasobra e compania mes no ta na haltura. Ta suppose cu mi mester subi cu tur e ekipo necesario y bo no ta caba tur e trabao ey den un dia”, maestro Sneek a indica.
Señor Sneek ta cien porciento activo cu e profesion aki y no ta pensa di bay cu pension, por lo pronto. “E trabao aki ta un pasion pa mi, e ta mi vocacion; no trabao solamente di piano tecnico pero tambe ta duna conseho ora di mudamento di piano: mi ta blokea e mecanismo, por ehemplo. Anto, como piano- tecnico, mi tin e capacidad pa valora un piano. No ta solamente ta wak con e piano ta toca pero ta wak tur parti esencial di e mecanismo di e piano, cu ta encera hopi punto”, maestro Roy Sneek a conta nos. Riba combinacion di potret por aprecia señor Sneek, eherciendo su trabao di tecnico di piano.
