Grupo di 75 manager y supervisor a certifica den tayer exclusivo di AHATA

ORANJESTAD (AAN):  Aruba Hotel & Tourism Association (AHATA), den colaboracion cu Caribbean Hotel & Tourism Association Education Foundation (CHTAEF),

a celebra e logro di 75 supervisor y manager durante un ceremonia di certificacion “Supercharged Bootcamp for Supervisors and Managers”.

   E programa avansa di un dia, a ofrece un experiencia interactivo, practico y di hopi impacto, desaroya exclusivamente pa profesional cu tin di maneha retonan actual den e industria di turismo. E bootcamp tabata pa e gradua¬donan certifica anteriormente den AHATA su “Own Your Supervisory Authority Responsibly” bootcamp di 2023 te 2025, pa asina duna nan un oportunidad pa amplia nan conocemento y fortalece nan capacidad di liderazgo.

   E bootcamp ta diseña pa duna supervisor y manager e herment necesario pa guia nan team cu confianza, subi nivel di rendimiento, y garantisa satisfaccion di cliente na un nivel excepcional. E participantenan a tuma parti den sesionnan di comunicacion avansa, coaching, strategia di responsabilidad, y excelencia den trabao di team.

   Presidente y CEO di AHATA, Señora Tisa LaSorte, a felicita tur participante pa nan dedicacion y rol importante den nos economia. Sr. James Hepple, Tesorero di CHTAEF tambe a comparti palabra di motivacion y elogio.  Señora LaSorte hunto cu instructornan di e tayernan Señora Louise John y Señora Suzanne Shillingford-Brooks a entrega e certification na e participantenan durante un celebracion yen di energia positivo. E anochi a conclui cu un recepcion alegre pa participantenan y demas invitado por sigui celebra y conecta cu otro. Durante e evento por a observa cu e supevisors di diferente compania a goza di conoce otro y siña di otro.

   AHATA ta gradici Eagle Aruba Resort & La Cabana Beach Resort pa nan aporte consistente cu ta permiti tayernan aki bira realidad y ta aprecia e aliansa valioso cu CHTAEF ta trece pa yuda eleva excelencia den servicio na Aruba.