Centro di Bario Noord a honra Mena Tromp-Eckmeyer pa su 50 aña di dedicacion na Noord

ORANJESTAD (AAN): Den cuadro di “Dia Intencional di Boluntario,” Centro di Bario Noord duna Honor na Señora Maria Filomena “Mena” Tromp-Eckmeyer pa casi 50 aña di dedicacion na Comunidad di Noord.

   Dia 5 di december, Aruba a celebra “Dia di Boluntario,” un dia dedica specialmente pa honra tur hende cu ta duna nan tempo, energia y talento pa sirbi nos comunidad. Den e cuadro aki, Directiva di Centro di Bario Noord (CBN) a tuma momento pa reconoce un figura realmente excepcional: Señora Maria Filomena “Mena” Tromp-Eckmeyer, un boluntario ehemplar cu casi 50 aña di dedicacion continuo na nos dushi distrito di Noord.

   E reconocemento a tuma luga durante e actividad di “Let’s Act,” patronisa pa CEDE Aruba, caminda CBN a pone Señora Mena den lus pa su contribucion incansabel riba generacionnan di hoben y mayor den nos comunidad.

   Un Bida Dedica na Boluntariado: Maria Filomena “Mena” Tromp-Eckmeyer, nace riba 26 di october 1943 na Aruba, ta un di e figura mas fundamental den e movecion di desaroyo comunitario di Noord. Su nomber ta liga cu cultura, pasobra, henter su bida adulto, Mena a dedica su tempuo pa mustra amor y entrega na mucha, grandinan y tur hende di e bario.

   Su pasion pa sirbi comunidad a cuminsa den añanan ’70, ora cu el a funda Grupo Union Infantil, su prome paso formal den mundo di boluntariado. E grupo aki tabata orienta pa crea actividadnan pa nos muchanan, duna nan un espacio segur pa siña, socialisa y desaroya.

   Sirbimento pa tur generacion: E impacto di Señora Mena no a keda limita na hobennan. Na 1988, e a lanta Grupo Flor di Bini Bini, un grupo dedica specialmente pa nos grandinan (60+), ofreciendo actividadnan social, recreaccional y cultural. E pas y simpatia cu Señora Mena tin pa nos mayor a trece hopi forsa den e grupo aki y hopi aña di alegria y union comunitario.

   Ademas, Señora Mena tambe a funda e grupo di baile Flor di Trinitaria, caminda el a brinda lesnan di baile folclorico na grandinan, manteniendo bibo nos tradicion y folclore. E grupo aki a participa den hopi presentacionnan cultural, representando Noord cu orgullo.

   Carnaval, Cultura y Comunidad: Un otro area caminda Señora Mena a mustra su creatividad y energia tabata Carnaval di Noord, un pasion cu e a tene pa hopi aña. Den su liderazgo, e a yuda organiza grupo, mantene tradicion y promove union den comunidad. Incluso, e tabatin su propio grupo bou di Centro di Bario Noord. E tabata tambe un miembro activo den Asistencia Social di Parokia di Noord, caminda el a sirbi pa hopi tempo, dedicando su corason tanto na e parti spiritual como na parti social di e parokia catolico.

   Rol Formal den Liderazgo Comunitario: E contribucion di Señora Mena no tabata solamente boluntario, sino tambe institucional.

(*) Miembro di Directiva di Centro di Bario Noord: 2005–2015. (*) Miembro di directiva di Stichting Drecha Cas Aruba: desde 1998, un fundacion cu ta yuda famianan cu menos recurso cu trabao, drecha y mantene nan cas.  E rolnan aki ta mustra cu su liderazgo tabata fundamenta, constant y di gran balor pa bienestar di famianan den Noord.

   Reconocementonan Mereci: Trabao asina profundo no por pasa sin honor. Den su bida, Señora Mena a ricibi diferente premio pa su entrega:

(*) 1992 – Premio Santa Anna, un di e premionan mas importante pa boluntario na Aruba.

(*) 2001 – Ridder in de Orde van Oranje-Nassau, un reconocimento real pa su contribucion excepcional na e sociedad Arubano.

(*) 5 di december 2025 – Reconocemento di CBN, entrega durante e evento Let’s Act hunto cu CEDE Aruba, pa casi 50 aña di sirbimento dedica, incansabel y di gran balor. Un Bida cu ta Inspira generacionnan Centro di Bario Noord ta expresa di curason:

   “Señora Mena, masha masha danki pa asina hopi aña di dedicacion. Bo entrega ta un ehempel pa

tur hende. Cu Papa Dios bendiciona Señora Mena ricamente.”  Señora Mena ta un simbolo di servicio, amor pa comunidad y entrega sin spera nada a cambio. Su legado ta keda pa semper den historia di Noord.