Grupo di 17 trahado social a finalisa nan curso di 'Ouderschap Blijft' y 'Paralell Solo Ouderschap'

Den cuadro di Plan di Mayor:

ORANJESTAD (AAN):  Diabierna ultimo a tuma luga e ultimo curso di "Ouderschap Blijft" y "Paralell Solo Ouderschap" na unda Prome Minister Evelyn Wever-Croes tabata tin e honor di certifica 17 profesional social cu a completa e curso aki exitosamente. Prome Minister a splica cu e ultimo 5 dianan aki, e trahadonan social a siña con pa ta mas involucra den loke ta trata separacion, of divorcio di pareha cu tin yiu.

            Plan di Mayor ta basicamente un plan, na unda mayornan ta specifica con nan lo comparti e responsabilidadnan cu nan yiunan den un documento legal. Esaki no ta solamente alimentatie, of unda e mucha ta bay biba, sino con ambos mayor por keda forma parti di e bida di e yiu despues di un separacion of divorcio.

            Manera ta conoci, tin casonan di separacion cu ta bay trankilo, na unda ta haci cu e palabracion nan ta bay mas facil, pero tin otronan cu ta fuerte na unda cu e pareha no ta yega na un consensus kico ta e miho pasonan pa tuma relaciona cu nan yiunan. Esaki ta loke e trainingnan aki ta encera, pa siña e trahadonan social con pa ta un miho "coach" pa e parehanan aki. Lo mas importante ta pa e parehanan aki realisa cu pa e mucha ta importante pa tin su mama y su tata den su bida.

            Prome Minister a indica di ta sumamente orguyoso di e grupo aki, pa completa e curso importante aki, y ta agradeci di por tabata tin e oportunidad di scucha di nan trabou y kico nan deseonan ta, pa Gobierno sigui cu ne riba e tereno aki. "Mi ta felicita Ministerio Di Asuntonan Social, sra Michella Steenvoorde Lacle cu a trek e proyecto aki y sra Magaly Maduro, directora di Bureau Sostenemi cu semper a apoya e vision. Tambe, un danki na tur e departamentonan cu a traha hunto riba e proyecto aki. Mi ta contento di por scucha e entusiasmo den cada un di e participantenan, di sa cu nan ta bon prepara pa por yuda guia e parehanan cu mester na bienestar di e muchanan. Masha pabien na tur", Prome Minister a expresa.