ORANJESTAD (AAN): Recientemente Departamento di Agricultura, Cria y Pesca Santa Rosa tabata tin cinco colega di hubilo.
E coleganan aki a dedica añanan di servicio na e departamento. Awendia no ta asina fasil cu personanan den sector laboral ta realisa aña di servicio asina remarcabel. Esaki ta bin tambe hunto cu e amor, passion y dedicacion cu bo ta hinca pa e por bira realidad. Den un solo palabra pabo dedica henter bo bida na tanto aña asina no ta wega.
E unico dama entre e cabayeronan sra. Diana Kock-Laurence a wordo reconoci pa su 35 aña di servicio aki na Santa Rosa. Sigui pa sr. Humphrey Croes cu 40 aña di servicio y dedicacion y na e momentonan aki ta fungi como hefe di adminisratie. Sr. Emiliano Croes cu tambe a dedica 40 aña di servicio. Sr. Castro Perez cu su 35 aña di servicio y tambe sr. Charles Croes a cumpli 30 aña di servicio y dedicacion na Santa Rosa.
Tur e coleganan aki ta masha ehemplar den nan tarea di tur dia. Semper cla pa yuda ora cu mester y cumpli cu nan tarea di tur dia sin problema.
Den presencia di minister sr. Ursell Arends encarga cu Sector Primario hunto cu director di Santa Rosa sra. Nathalie Maduro a hasi entrega di e reconocimento na e hubilarionan di Santa Rosa. Despues a sigui un treat chikito pa demas coleganan.
Palabra di gratitud y felicitacion pa nan pasenshi y añanan di servicio y dedicacion na Depatamento di Agricultura, Cria Pesca, Santa Rosa.
