A.T.A. ta lansa campaña pa trece mas concientisacion den comunidad pa un 'Aruba limpi'

Bao di lema 'un Aruba dushi pa biba, ta un Aruba dushi pa bishita'

ORANJESTAD (AAN): Ronella Croes, CEO di Aruba Tourism Authority (A.T.A.), a hiba palabra den conferencia di prensa, tocante diferente iniciativa y rol cu ATA ta hunga den e Campaña Nacional 'Limpi Limpi'.

Croes a cuminsa na bisa cu ta sumamente importante pa ATA pa yuda trece concientisacion den comunidad pa tene Aruba limpi y cu tambe por conduci na un Aruba mas limpi. Esaki ta importante no solamente pa nos bishitantenan pero pa nos mesun hendenan. El a conta cu ex-directora di turismo, señora Myrna Jansen, a introduci un slogan cu ainda ta keda valido, 'un Aruba dushi pa biba, ta un Aruba dushi pa bishita'.

ATA ta midi a base di Guest Experience Index e 'feedback' di bishitantenan riba diferente topico, entre nan, ta e topico di limpiesa, kiermen, con limpi Aruba ta. Esaki ta compila tur opinion relaciona cu Aruba. Riba e tema aki, Aruba ta score relativamente bon. Pero ta keda varios comentario relaciona cu sushedad, specialmente den areanan hopi frecuenta, incluyendo nos beachnan.

Segun Croes, pa ATA ta un placer, banda di iniciativanan existente, pa lansa un otro iniciativa. Pa añanan caba tin diferente accion cu ta enfoca riba e limpieza di nos pais, esaki ta haci por ehemplo, door di coloca diferente bari di sushi rond di e isla, unda cu no solamente ta permiti e usuarionan haci uso di nan, pero tambe ta stimula separacion di sushi. Barinan di sushi cu ta situa den diferente area, y ta pidi e usuarionan pa separa plastic, aluminio, for di e otro sushinan restante.

E campaña lo tin un duracion di 3 luna y lo stimula comportacion responsabel pa medio di diferente iniciativa, incluyendo e oportunidad pa gana un aña gratis di coleccion di desperdicio residencial na final di e campaña. Adicionalmente, e campaña lo traha hunto cu diferente organisacionnan no-gubernamental, di entre otro Scubble Bubbles, pa organisa actividadnan di limpiesa na nos playanan y na otro sitionan/ districtonan tur rond di nos isla. Hunto cu Ban Serio, lo traha riba iniciativanan special pa crea consientisacion cerca nos muchanan y hobennan. Den luna di november, scolnan por participa den e campaña di Aruba Limpi door di graba un mensahe y asina tin chens di gana un aña di limpiesa pa nan scol.

“Nos ta kere cu un Aruba limpi no ta solamente un deber: e ta un refleho di nos amor y compromiso pa nos isla stima. Door di uni forsa den e campaña aki, nos por haci un impacto significante y crea un futuro mas sostenibel pa Aruba” tabata palabranan di Ronella Croes.