Gremionan y Douane a reuni riba e preocupacion tocante e “Douanewaarde” cu ta cobra Impuesto riba dje

ORANJESTAD (AAN):  Despues cu Comerciante Uni Aruba (CUA) un par di siman pasa a saca un video relata na con Douane ta calcula impuesto riba productonan cu ta bin for di exterior

, Director di Douane Aruba, Sr. R. Croes, a invita directiva di CUA como tambe di Aruba Trade & Industry Association (ATIA) pa un reunion.

            E reunion a bai den un manera ameno unda hopi informacion a wordo intercambia, pa ambos directiva di CUA y ATIA, y alaves tambe pa e Director di Douane cu su team di expertonan.

            E gremionan a splica kico e situacion real ta cu comerciantenan y “brokers” ta encontra ora tin, especialmente un descuento riba facturanan, di por ehempel Amazon.

            A splica, cu den pasado, e brokers a wordo informa cu mester kita e descuento di e factura, pa asina calcula e impuesto riba e prijs total y no e prijs cu en realidad a wordo paga.

            E team di experto a splica e posicion di Douane, pero e gremio a presenta cu un abogado tambe pa splica e parti con comercio ta interpreta e ley.

            Nan ta contento di por a haya e oportunidad pa enfatisa cu base legal e interpretacion economico di “valor” (kico e ta). “Valor” ta locual un bendedo y cumprado a bai di acuerdo cune, locual a wordo pone riba factura como un prijs y a wordo paga pa e cumprado na e bendedor.

            Si e prijs aki ta inclui un descuento of no, esey ta e valor paso esey na final a wordo paga. Sr. Croes a informa cu pronto Douane lo por duna nos y comunidad un splicacion mas amplio regardando e ley y proceso.

            Prome cu e reunion a termina, e gremionan a tuma e oportunidad pa puntra con a para cu e reforma y simplificacion di e ley di Impuesto. Sr. Croes a informa cu e reforma ta canando su caminda, y pronto lo sinta cu gremionan pa splica mas den amplitud tur e cambionan cu lo ta na caminda.

            Nos como directiva di e gremionan CUA y ATIA ta agradeci na tur Douanero y e team di Sr. Croes, paso por mira cu e departamento aki ta hasiendo nan maximo esfuerzo uzando tecnologia moderno pa por saca carga mas liher posibel pa asina comunidad semper tin su productonan disponibel.

            Gremionan y Douane lo tin mas reunion den futuro unda tambe nan miembronan por vocifera nan preocupacionnan paso asina por bin na solucion y comprension.