Fundacion Pa Nos Muchanan a organisa charla pa mayor cu a pasa den proceso di separacion

'Mayor ta pa semper aunke no ta bou mes un dak'

ORANJESTAD (AAN): Recientemente Fundacion Pa Nos Muchanan a presenta e anochi informativo pa mayor titula: “Mayor ta pa semper, aunke no ta bou mesun dak”, na unda un total di 9 mayor a participa.

            Segun estudio, Aruba ta den e top 5 pais cu e porcentahe mas halto di divorcio. Divorcio y separacion por afecta e famia completo, incluyendo e yiunan den e famia. Mirando e cantidad halto di separacion y divorcio na Aruba, e ta importante pa mayornan ta na altura di e efectonan cu esaki tin riba nan yiunan y tambe con ta e miho manera pa guia nan yiunan durante e proceso aki.

            Durante e anochi informativo tabata tin como invitado special y orador Terapista di famia y pareha Enid De Kort y Ortopedagogo Shaska Kock.

            E meta di e anochi informativo tabata pa siña mayornan tocante e aspecto di ta den un famia mixto. Mayornan a siña con esaki por afecta nan yiunan y nan famia. Ademas, con nan como mayor por guia nan yiunan den e proceso di separacion.

            Mayornan a siña con pa papia cu nan yiunan durante un temporada cu tin hopi cambionan andando. Finalmente, mayornan a siña con pa anda cu e diferente emocionnan di nan yiunan cu por presenta durante tur e cambio. Mirando cu separacion, divorcio y e cambionan cu un mucha ta pasa aden ora di cuminsa biba den un famia mixto por tin efecto riba e mucha, nos como organisacion ta haya importante cu mayornan ta educa y informa ariba con pa guia nan yiunan durante un situacion asina.

            E anochi informativo pa mayor tabata uno exitoso, na unda esnan presente tawata tin e oportunidad pa haci pregunta na e oradornan, comparti nan experiencia y intercambia ideanan cu otro mayornan cu tambe a pasa den separacion y ta forma parti di un famia mixto.