Graduada di Universidad a splica riba retonan cu adultonan mayor ta confrontando

Trabao admirabel di Keyla Helder

ORANJESTAD (AAN): Recien el a gradua pa e bachelor degree di Social Work and Development.  E programa aki di SWD ta uno di e Facultad di Arts and Science na Universidad di Aruba.

   Ta trata aki di Keyla Helder, kende a enfoca riba e calidad di bida di nos adultonan mayor.  Esey ta loke el a basa su tesis riba dje.

   Den fin di siman, Ministro Ursell Arends su bureau, a ricibi bishita di Keyla Helder kende a duna splicacion riba su thesis titula “Quality of life of elders and challenges they face.”  Esey nifica: “Calidad di bida di e adultonan mayor, y e retonan cu nan ta confrontando”.

   Ministro Arends a sinta y mira e presentacion cu hopi atencion.  El a splica cu Keyla su dedicacion y pasion pa traha pa adultonan mayor ta di admira. Ministerio di Adulto Mayor y Directie Ouderenzaken ta sumamente orguyoso di Keyla y ta desea hopi exito pa futuro.  DIARIO tambe ta felicita Keyla cu su recien graduacion, y cu e fabuloso tesis riba e tema aki cu ta hopi al caso e momentonan aki.