Gobiernonan no semper ta reconoce e necesidad y importancia di inverti den Cuerpo di Bombero

Jonathan Ramada, presidente di Sindicato di Bomberonan

“Apesar limitacionnan, nan ta sigui improvisa y cumpli cu nan trabou” 

ORANJESTAD (AAN): Jonathan Ramada, presidente di Sindicato di Bomberonan, a duna un splicacion tocante e ultimo desaroyonan rond di Brandweer y e situacion actual di e bomberonan. Segun Ramada, Cuerpo di Bombero ta enfrenta varios reto y, durante e ultimo añanan, cambionan den maneho y diferente decisionnan a causa cu e organisacion a perde cierto stabilidad y harmonia interno. 

Ramada a indica cu den manehonan anterior varios decision importante a ser tuma, pero cu te ainda algun di e cambionan acorda no a ser implementa. Mientras tanto, Cuerpo di Bombero ta keda spera riba e ehecucion di e cambionan aki. 

Señor Ramada a subraya cu, tempo cu Brandweer a sinta cu e formadornan, nan a pidi pa haya un comandante yiu di tera. E deseo aki a bira realidad y, segun e, e cuerpo completo ta satisfecho cu e nombramento. Sinembargo, el a agrega cu e comandante ta enfrenta hopi reto y cu ta importante cu e por conta cu apoyo di personanan den puestonan clave, pa asina logra trece e cuerpo bek den un ambiente di bon harmonia y cooperacion. 

Segun Ramada, como un departamento cu ta sirbi pueblo, un di e retonan mas grandi ta e aspecto financiero. El a expresa cu gobiernonan no semper ta reconoce suficientemente e necesidad y importancia di inverti den Cuerpo di Bombero. 

A pesar di e limitacionnan, Ramada a elogia e esfuerso di e bomberonan. Segun e, cu falta di material y recurso, e cuerpo ta sigui improvisa y cumpli cu su trabou cu e tiki material cu tin disponibel actualmente. Aunque esaki no ta facil, e personal ta sigui haci su trabou cu dedicacion y hopi amor pa su profesion. 

“P’esey mi ta desea cu pueblo sa esaki y cu gobiernonan cuminsa inverti un tiki mas den e Cuerpo di Bombero,” señor Ramada a expresa.