Segun Ministro Arthur Dowers
ORANJESTAD (AAN): Segun Minister Arthur Dowers, e situacion financiero dificil di Arubus ta, pa gran parti, consecuencia di decisionnan y mal maneho durante gobernacionnan anterior. Den un entrevista reciente cu DIARIO, Dowers a señala cu interferencia politico y decisionnan financiero poco responsabel a laga e compania cu un carga grandi.
E minister a indica cu e tin comprension pa e trahadonan di Arubus y cu, segun e, nan merece un situacion miho. Sinembargo, el a enfatisa cu cualkier solucion mester wordo implementa di forma responsabel y dentro di e reglanan financiero y presupuestario vigente.
“Awendia tin CAFT cu ta tirando bista, Ministerio Publico cu kier hiba bo cera na momento cu nan bisa bo cu bo a haci mal uzo di bo poder como minister. Kiermen, bo mester cana strit-strit pa e cosnan bay bon, y ta necesario,” Dowers a expresa.
Segun e minister, un di e problemanan hereda ta un debe adicional di aproximadamente un miyon florin crea sin respaldo den presupuesto y sin cu Arubus a ricibi e fondo corespondiente di Gobierno. El a menciona tambe companianan crea den pasado bou di Arubus cu, segun e, enbes di genera entrada, a bira un carga adicional pa e empresa.
Dowers a enfatisa cu e situacion aki no ta resultado di fayonan di e trahadonan di Arubus, sino principalmente di decisionnan politico y administrativo di pasado.
Gobierno, segun e, a cuminsa atende algun di e carganan financiero. Entre otro, ta trahando pa drecha e sistema di Aruparking y pa recupera fondo cu, segun Dowers, mester beneficia Arutram. Tambe ta dialogando cu Arubus tocante un peticion pa indexering, cu lo wordo evalua pa determina si por incorpora esaki den presupuesto di otro aña.
Hunto cu Ministerio di Finansa, Gobierno lo mira tambe con por atende e debe di aproximadamente 18 miyon florin cu Arubus ta carga pa hopi aña.
“Tur paso necesario ta wordo haci. Nos ta comprende e trahadonan y e presion cu nan tin, pero nos ta trahando cu tur parti pa mehora e situacion di Arubus,” Minister Dowers a enfatisa.
