Segun Jonathan Trinidad, lector na Universidad di Aruba:
ORANJESTAD (AAN): Mientras Aruba ta enfrenta un realidad social cada bes mas compleho y diverso, e necesidad pa profesionalnan prepara den ramo di trabou social ta bira cada bes mas necesario.
Universidad di Aruba ta responde na e necesidad aki cu un curiculo renoba, diseña specificamente pa e realidad y desafionan di nos comunidad. Jonathan Trinidad, lector na Universidad di Aruba, a indica cu durante e ultimo cuatro añanan nan a traha intensivamente riba renobacion di e curiculo, den colaboracion cu diferente partner y instancianan interesa.
Segun Trinidad, e curiculo nobo ta adapta specificamente na e necesidadnan actual di comunidad Arubano. Un di e aspectonan importante ta su caracter multilingual, combina cu un enfoke fuerte riba diversidad. E lesnan no ta wordo duna solamente na Papiamento, sino tambe na Hulandes, Ingles y Spaño.
Trinidad a splica cu e cambio principal den e programa ta hustamente pa acerca e formacion mas tanto posibel na realidad di nos comunidad, cu dia pa dia ta bira mas diverso como resultado di e diferente nacionalidadnan, culturanan y idiomanan presente na Aruba. Pa un trahado social, e realidad aki ta algo cu despues mester por pone den practica den su trabou diario.
“Cu tur e ahustenan aki, nos a cambia e programa den un manera cu, na final di dia, e por duna un aporte positivo y un contribucion real na comunidad completo. Esaki ta tambe danki na nos partnernan, cu a duna nan aporte durante e proceso di renobacion di e programa,” señor Trinidad a expresa.
El a agrega cu e interes den profesion di trabou social ta presente y cu den ultimo añanan por a observa cierto crecemento. Segun Trinidad, aña pasa e programa tabatin un grupo di aproximadamente 30 studiante, cual e ta considera un grupo basta grandi. E aña academico aki e cantidad ta mas abou, cu 16 studiante. Sinembargo, segun e, loke ta importante ta cu e continuidad di e programa ta keda garantisa.
Trinidad a destaca tambe cu durante e aña academico aki, e prome grupo di studiante cu a sigui e curiculo renoba lo gradua. E curiculo aki a trece diferente cambio y innovacion, cu e meta di prepara e studiantenan mihor pa responde na e necesidadnan social actual di nos comunidad.
El a enfatisa cu, aunke tin suficiente interes den e profesion, trabou social no ta un profesion facil.
“Pero, na final di e estudio di cuatro aña, e studiantenan ta gradua como profesionalnan prepara pa cuminsa traha como trahado social, pa atende e necesidadnan di comunidad y aporta positivamente pa, di berdad, yuda minimalisa e problematicanan social cu nos ta confronta tur dia,” señor Trinidad a expresa.
