Gobierno y IBiSA lo tin un gran evento di ‘Aruba Activo 2026’

ORANJESTAD (AAN): Un anuncio grandi a wordo haci door di Ministerio di Deporte y tambe door di IBiSA,

esta cu nan lo dedica e fecha di Diadomingo 27 di September 2026 como e dia di “Aruba Activo 2026”.  Esaki relaciona cu 50 aña di Idefre/IBiSA yena di movecion y deporte na Aruba.

     Dia 27 di september, lo bay pone Aruba den movimento cu Aruba Activo 2026, cu ta un iniciativa di IBiSA cu ta uni deporte, salud, bienestar y comunidad den un gran dia pa tur generacion.

   For di 5’or di mainta, “Caya Activo” lo habri un espacio liber y sigur desde Banco di Caribe te Bushiri Beach, caminda cada hende por cana, core, core bais, practica deporte of simplemente disfruta di un Aruba activo. E programa lo continua te 7’or di anochi na Bushiri Beach.

   “Como Minister di Deporte, mi ta sumamente contento cu nos por celebra e 50 aniversario di Idefre/IBiSA poniendo precisamente nos comunidad den movecion,” Ministro Gerlien Croes a declara. “Pasobra deporte ta uni, deporte ta crea oportunidad y un comunidad activo ta un comunidad mas saludabel.”

   Ministro a duna danki na IBiSA, su colega Minister Wendrick Cicilia, Lotto pa Deporte, Aruba Tourism Authority y Aruba Airport Authority pa uni forsa y haci Aruba Activo 2026 realidad.

   E actividad lo ta Diadomingo 27 di September 2026 for di 5:00 am te cu 7:00 pm.

   Caya Activo:  Como “Caya Activo” ta refer na henter e caminda di Vondellaan (Banco di Caribe bay zuid), y gran parti di Henny Eman Boulevard (Rotonde Cas di Cultura bay pabao) te na Bushiri Beach.

   Aruba Activo: Como “Aruba Activo” ta referi na actividadnan na Bushiri Beach, cu ta inclui Beach Volleyball Intergubernamental y hopi mas.

   Pues ta pidi tur hende na Aruba pa “activa” un dia pa tur generacion ta activo y den movimento.