Giovanni Heyliger ta destaca impacto positivo di Pan Americano pa Aruba

Invitacion na comunidad pa asisti awe y mañan pa e clausura

ORANJESTAD (AAN): Durante e dianan aki, precision, velocidad y concentracion ta reuni deportistanan for di diferente parti di mundo na Aruba. Nos isla ta sirbi como sede di 2026 Pan American Handgun Championship, un di e eventonan internacional importante den practical shooting. 

E Pan Americano ta reuni mas di 700 competidor procedente di alrededor di 44 pais pa participa den un campeonato di nivel halto. Di 22 te cu 30 di augustus, Wela Shooting Range na Savaneta ta transforma den un punto di encuentro pa e comunidad internacional di practical shooting, cu competencianan den diferente categoria y nivel. 

Den un entrevista cu DIARIO, e promotor di e competencia, señor Giovanni Heyliger, a enfatisa e importancia cu un evento di e magnitud aki tin pa Aruba. Segun e, haya e oportunidad pa organisa Pan Americano na nos isla ta un privilegio grandi, apesar di e cantidad di trabou, preparacion y gastonan cu ta envolvi den organisa un campeonato internacional asina. 

Señor Heyliger a destaca tambe e impacto positivo cu e evento tin riba turismo. Ademas di e mas cu 700 participantenan internacional, hopi di nan ta biaha hunto cu nan famianan pa presencia e competencia. Varios participante ta permanece na Aruba pa mas cu dos siman, combinando e campeonato cu vakantie. 

Segun señor Heyliger, esaki no solamente ta genera movimiento economico, pero ta contribui tambe na promocion internacional di Aruba, ya cu participantenan y nan famianan ta comparti nan experiencia riba diferente plataforma di social media y asina yuda promove e isla como destinacion. 

Finalmente, señor Heyliger a expresa su gratitud na tur hende cu a contribui y traha intensamente pa haci e evento un exito. El ta extende un invitacion na pueblo di Aruba pa presencia e competencia awe, diasabra 29 di augustus, y tambe e clausura diadomingo 30 di augustus. 

Pa motibo di siguridad, tur bishitante mester obligatoriamente uza bril di proteccion y proteccion pa orea durante nan presencia na e shooting range.