Gobierno y FCCA ta bay renoba Bushiri Complex

*Di e 45 barionan tur rond di Aruba, lo inicia cu 15 bario 

ORANJESTAD (AAN): Diahuebs mainta, durante e Accion di Bario na Bushiri Complex, Prome Minister mr. Mike Eman, acompaña pa representantenan di FCCA, a comparti e grato noticia cu FCCA, hunto cu Gobierno di Aruba lo inicia e renobacion di Bushiri Complex den su totalidad.

   Mirando den pasado con Gabinete Eman I y II a revitalisa e casnan social na Yuwana Morto Complex y De Vuyst, Yara Complex, Village, Semeleerstraat y Sero Patrishi, awo ta turno pa revitalisa Bushiri Complex. Hunto cu FCCA, lo bay duna e bario di Bushiri un “facelift” pa crea un ambiente miho pa e habitantenan y trece harmonia bek.

   Sra. Jessica Posner di FCCA a splica cu e mision primordial di FCCA ta pa crea casnan accesibel y pagabel, pero cu un cas so su, sin e otro facilidadnan no ta bira un dushi hogar. Lo enfoca riba dos pilar strategico pa renoba e calidad di bida di e habitantenan. Esaki ta inclui camindanan renova, areanan di sombra, acera renoba, facilidadnan di recreacion y varios mata. Di e 45 barionan tur rond di Aruba, lo inicia cu 15 bario cu ta inclui esun di Bushiri. Ta importante pa enfoca riba e barionan existente y mirando pa dilanti, tur proyecto nobo di FCCA lo mester ta haci den un forma holistico cu ta inclui tur e aspectonan necesario pa un bon calidad di bida.

   Parlamentario Stephanie Sevinger, habitante di e area di Bushiri, tambe tabata presente y hopi orguyoso cu e anuncio importante aki pa su bario. Ta importante pa por biba un bida digno cu ta inclui e posibilidad pa como habitante, por recrea, move, socialisa y crea areanan comun cu hunto ta mantene. Parlamentario Sevinger ta hopi contento pa wak con FCCA hunto cu Gabinete AVP-Futuro ta duna prioridad na e barionan cu mas ta neglisha.

   Prome Minister Eman a subraya e importancia di nan filosofia profundo, “un filosofia di fe, amor y speransa manera cu nos ta sinti cu nos comunidad na e momento aki mas cu nunca tin mester, y pa e motibo ey, e binimento hunto awe di e comunidad en busca di un mehoramento di bida pa nos ciudadanonan, pa nos ta sumamente importante”. “E bon comun nos mester pone nos dilanti caminda ta bay sirbi e interes, balor y cuido di nos ciudadanonan’.