Situacion mundial ta exigi mantencion estricto di Ley di Contabilidad
*Produccion y uzo di placa di Aruba den man di mr. Geoffrey Wever
*Placa di Pueblo den man di participante central den dos Gobierno sigui
ORANJESTAD (AAN) — Pa Aruba por wordo goberna a base di loke Ley ta stipula, gobernantenan di Aruba mester tene na e Ley di Contabilidad, cu manera DIARIO a semper a splica ta pone condicion serio na e forma cu un politico por gasta placa di Pueblo.
Ta na momento di suspenso y problemanan mundial y local grandi, e exigencia pa placa di Pueblo wordo gasta segun ley, ta bini dilanti.
E placa cu politiconan ta gasta, ta wordo kita for di boca di Pueblo directamente of indirectamente, pa medio di tur tipo di belasting cu ta wordo impone riba Pueblo, riba casnan comercial y tur loke ta produci ganashi na Aruba.
E sistema di belasting ta exigi Pueblo entrega placa pa paga gobernantenan como parti di gobernacion y cobransa di belasting mara na castigo pa incomplemento, ta bay tambe pa paga tur gasto relaciona cu e parti politico di pais, cu un aparato gubernamental encabeza pa Gobierno eligi dor di Parlamento, ta dirigi.
DIARIO semper a splica Aruba cu Ley di Contabilidad mester ta e proteccion grandi di placa di Pueblo ya cu e ta describi y exigi kico ta pasa cu placa di Pueblo, pero pasobra e no conoce castigo pa abuso, historia a entrega resultadonan cruel di loke ta pasa cu un Pueblo cu ta paga belasting pero no conoce e gobernacion cu segun e sistema di leynan democratico ta exigi, ta maneha e pais.
Esaki a conduci na e hecho cu for di 2018 Aruba ta wordo somete na medidanan financiero, cu ta kita pan for di boca di Pueblo cu mester paga mas belasting pa cubri e resultado di e abuso cu a wordo haci cu placa di Pueblo.
Aunke Ley ta habri posibilidad pa un ciudadano persigui pa medio di Corte di Husticia un gobernante cu a bay contra bienestar di Pueblo of di un persona, e proceso practicamente nunca ta wordo aplica den un sistema den cual accion comunitario ta preferi riba accion personal, cu hopi bez ta crea indirectamente resultadonan desfavorabel pa e ciudadano.
Futuro y bienestar di un Pueblo ta depende directamente di e placa cu e tin pa gasta den caha di Pueblo cu segun ley semper mester tin fondo y no debe pa honra necesidad di Pueblo.
Intervencion Hulandes a suscribi e berdad hancra den Statuut y Constitucion.
Placa di belasting ta sagrado pasobra e ta e placa cu henter Pueblo ta entrega for di entrada di tur ciudadano cu fondo suficiente pa aporta na su pais y tambe tur loke ta produci placa na Aruba como comercio y entrega di servicio.
Ley di Contabilidad awor ta den man di mr. Geoffrey Wever, kende ta conoci cu e forma cu Aruba a haci sacrificio pa recupera despues di e pandemia cu a cera economia di Aruba.
Como Ministro pa partido Raiz, mr. Geoffrey Wever for di fin di 2021 ta forma parti di gobernacion di Aruba y tabata parti di Gabinete Wever-Croes cu a realiza e hazaña grandi di percura cu gobernacion ta basa riba un maneho financiero di Acuerdo cu Ley di Contabilidad.
Den Gobierno Wever-Croes, mr. Geoffrey Wever tabata encarga cu economia di Aruba cu mester produci placa pa e pais y su habitantenan por tin placa pa paga belasting y asina cubri gastonan di gobernacion completamente den cuadro legal di e pais.
Manera DIARIO a anticipa, e situacion mundial ta sumamente serio y ta exigi pa placa di Pueblo ta bon maneha.
Den gobernacion actual di Aruba, pues e dos carteranan cu directamente mester produci y cuida placa pa Aruba cu ta economia y asuntonan financiero, ta den man di mr. Geoffrey Wever.
DIARIO ta vigila e situacion di acerca e trabounan riba tereno financiero di Aruba y di reunionnan cu ta tuma lugar cu Departamento di Asuntonan Financiero, pero tambe DIARIO ta sigui tur informacion relaciona cu ehecucion di e Ley di Contabilidad y relaciona cu control di entre otro Algemene Rekenkamer Aruba, cu ta encarga pa controla tur gasto y ta e tribunal di Pueblo ariba tereno financiero.
E maneho financiero di un pais mester ta cuadra cu e realidad di un pais.
Como Ministro for di 2021, mr. Geoffrey Wever ta conoci cu e forma cu mester a goberna Aruba for di 2021 te medio di 2024 tabata dirigi riba gobernacion cu porfin a logra entrega Pueblo un alivio di medidanan cu a wordo impone pa scapa Aruba di e abismo financiero cu a resulta na 2018 na un pakete rigido di medida.
Awor como Ministro di Asuntonan Economico y Asuntonan financiero, cu e capacidad pa conduci e pais na logro manera el a demostra den gobierno anterior, como dirigente actual di asuntonan financiero y economico por garantisa e maneho cu a produci saldo favorabel na Aruba na 2024, loke a produci e fondo cu Gobierno tin na 2025 pa gasta placa y asina restablece e alma di Ley di Contabilidad cu den maneho financiero ta exigi pa economia resulta den mas pan riba mesa pa e ciudadano hasta den un crisis mundial!
