Gobierno y Crisis Team ta anuncia eliminacion di uzo obligatorio di tapaboca

ORANJESTAD (AAN):   Dialuna atardi, Prome Minister Evelyn Wever-Croes hunto cu miembronan di Crisis Team Covid-19 a haci anuncionan importante relaciona cu flexibilisacion di medidanan cu lo drenta na vigor entrante diaranson awor 9 di Juni.

Na prome lugar e mandatario a cuminsa bisando cu 4 siman pasa el a indica cu poco poco ta mirando e luz na final di e tunel y awo ta hopi mas cerca.

E mandatario a referi mesora na e cifranan recien di Covid-19 unda por mira cu e averahe di casonan nobo pa dia ta na 11.

Te cu dialuna, e 'positivity rate' tabata 13% y esaki ta averahe di e ultimo 7 dianan, a bisa.

Esaki ta indica cu e pandemia ta bao di control. E crisis no a pasa ainda. E casonan activo desde 1 di Maart, por ehempel, tabata tin un piek, pero ya pa basta tempo caba ta na un nivel cu a baha considerabelmente y cu ta tratando di mantene abao, a remarca.

Wever-Croes despues di a haci un resumen di e situacion a anuncia cu entrante diaranson 9 di Juni ta bay flexibilisa e siguiente medidanan:

1. Vacuna

E parti cu ta cambia akinan ta cu si un persona ta vacuna (cu tur dos dosis y ta mas cu 14 dia cu el a vacuna) e no mester bay den cuarentena si e tabata den contacto cu un persona positivo.

2. Tapaboca:

Uzo di Tapaboca  no ta bay ta obligatorio mas, si pero recomendabel den tur caso unda no por mantene distancia di 1,5 meter, por ehempel den grupo di hende, na aeropuerto, etc.

E responsabilidad ta keda na tur persona cu mester dicidi ki ora ta bisti e tapaboca ora cu no por garantisa e distancia.

Pa loke ta establecimento, nan si por sigui exigi uzo di tapaboca den nan lugar si nan ta haya cu esaki ta necesario.

Tambe ta recomenda tur hende, vacuna y no vacuna, pa cana cu un tapaboca pa den caso cu ta presenta un situacion unda cu no por garantisa e distancia di 1,5 meter di un otro hende of cu bo mester drenta un establecimento unda si ta exigi e uzo di tapaboca.

Esnan cu no ta vacuna ta mas cu recomendabel pa keda uza tapaboca tur caminda pa bo proteha bo mes. 

3. Deporte

Deporte organisa cu tabata posibel caba awor ta permiti publico sin limite. Mester tene cuenta si cu e distancia di 1,5 meter of e tapaboca. Deporte di contacto awor tambe ta permiti. 

4. Gebiedsverbod

E Gebiedsverbod (aglomeracion riba cierto areanan) ta wordo elimina.

Prome Minister a enfatisa cu e prohibicion pa loke ta alcohol riba caminda publico tey ainda.

Ta keda si cu algun di e otro exigencianan manera orario di ciere, alcohol verbod, bailamento tampoco ta permiti ainda, actividadnan grandi cu aglomeracion grandi di personanan.  

El a splica cu no kier flexibilisa tur medida pareu. Ta bay stap pa stap pa analisa kico a cambia y kico lo ta e proximo pasonan cu lo por tuma, e mandatario a duna di conoce.