DIARIO ta intensifica investigacion Marisol como Ministro

Con asuntonan di tereno a pasa den e Departamento di Gobierno DIP? -  *Overtime abundante a wordo paga na miembro di MAS den pandemia?

ORANJESTAD(AAN)—Cuanto placa di Pueblo di Aruba en total a wordo paga na e miembro di Partido MAS, Alexander Wernet? Esaki ta un pregunta cu DIARIO mester lansa mientras mas y mas informacion ta alcansa DIARIO riba loke lo a tuma luga durante e tempo cu Marisol Lopez-Tromp tabata fungi como Ministro di Aruba atrobe.

Manera DIARIO a presenta den edicionnan di siman pasa, e cas di Madushi na Noord a drenta publicidad atrobe cu documentonan cu ta proba con den e tempo cortico cu Marisol a fungi como Ministro pa e partido POR, el a logra regla e asunto di tereno pa su ruman Lelicia Tromp, cu ta riba su lista di MAS.

DIARIO a splica Aruba cuanto documento a cuminsa ta circula na Aruba pa cuestiona e forma cu Marisol Lopez-Tromp lo a privilegia personanan cu ta den su circulo directo y awe tambe parti di su partido.

Importante ta bira e pregunta, con e asunto aki a wordo atende na DIP, cu ta atende cu asuntonan di erfpacht y huur di tereno cu ta propiedad di pueblo.

DIARIO ta den pleno investigacion di e caso, cu directamente ta cuestiona integridad Ministerial, cu no ta permiti pa un Ministro atende un caso den cual su propio ruman y sigur no den e tempo record cu e asunto di Lelicia a keda regla dor di Marisol Lopez Tromp como Ministro cu aprobacion di DIP.

Mientras DIARIO ta atende e asunto di tereno, informacion a drenta riba sumanan cu tabata wordo paga na overtime dor di Marisol Lopes Tromp. Asina tin un lista di Overtime cu a wordo paga na April 2020 na Alexander Wernet, manera DIARIO ta presenta cu prueba.

Alexander Wernet, cu tambe ta riba lista di MAS, lo a traha como consehero di Marisol y segun areglo oficial ya e consehero/coordinador di un Ministro ta ricibi compensacionnan special cu por ta 25 porciento di un sueldo.

DIARIO ta sigui cu su investigacionnan riba e temporada cu Marisol Lopez-Tromp a fungi como Ministro di Aruba y a causa uno di e dramanan politico mas grandi cu historia di e pais a conoce ora su partido a pidi pa e retira como Ministro na 2020.