Un instrumento democratico por bira peligroso sin bon maneho profesional - *Mike a haya e oportunidad cu e tabata busca pa bolbe despues di sconde - *DIARIO ta bini cu prueba con Gabinete Mike Eman a haya chens pa laba cara
ORANJESTAD(AAN)—For di 2017 Mike Eman a dedica su mes na solo mision. Sconde pa berdad no alcansa su persona.
Pa evita cu e mester a enfrenta Pueblo di Aruba, cu el a laga na suela na 2017, el a desaparece.
Aruba no a duna Mike e cantidad di voto cu Mike tabata kier y esaki tabata motibo pa Mike a prome celebra cu e tabata e votegetter mas grandi na Aruba, cu semper tabata su ilusion mayor, pa despues e yora pasobra e mester bay Parlamento y no oficina di Prome Ministro, cu el a pensa cu e mester ta pa resto di su bida.
Mike a bisa cu e ta bandona partido, politica, cu e no ta drenta Parlamento. Un cantidad grandi di Arubiano a hala rosea grandi ora el a bisa cu e ta bay, pero despues di tempo Mike a demostra cu el a keda Mike.
Mientras AVP a reuni, Mike a haya oportunidad atrobe pa bira e heroe cu ta bolbe cas y cu brassband el a core drenta pa tur hende brasa y sunchi.
Pero Mike Eman a keda leu di Parlamento, caminda representantenan di Aruba a bini hunto, eligi Evelyn Wever-Croes como Prome Ministro di Aruba, cu a pasa den shock di su bida.
Kico Evelyn Wever-Croes a hereda di Mike Eman, ta historico.
E caha di placa no solamente tabata bashi, pero e caha di debe tabata yen y manera Hulanda mes ta adverti Aruba te awe, lo topa cu 2040 ainda cu debe.
Evelyn Wever-Croes mester a mira kico e ta haci pa e por a evita cu Aruba ta keda bou olanan di e lama bruto cu Mike Eman a hinca Aruba aden y na 2018 medidanan pisa mester a wordo tuma pa evita cu ta declara Aruba bancarota.
Na mes momento, Aruba mester a bay atende cu Citgo cu no a trece e crecemento economico cu Mike Eman a priminti, pero si a trece e problema di cantidad di criminal cu a yega di bini Aruba pa Citgo y cu Interpol tabata busca rond mundo.
Si na 1986 Mike mester a mira como sombra di su ruman homber, Henny, con e inversionistanan cu nan a trece e tempo a resulta di ta Maffia y nan mester a bandona Aruba na careda, na 2016 Mike a trece Nicolas Maduro y su grupo di Citgo cu Merca tabata busca pa criminalidad.
Te awe Aruba mester ricibi mas informacion di e holoshinan cu lo a bini Aruba hunto cu placa di Citgo, segun Citgo mes a bisa Evelyn Wever-Croes cu a bay tuma yabi di refineria for di Citgo.
Cu un economia na suela y un caha di placa bashi, Aruba a bira herencia di Mike Eman, cu nunca a drenta Parlamento pa yuda Aruba Aruba ni sikiera na momento cu pandemia a haci cu mester a cera porta pa Aruba.
Awe Aruba ta den desgracia total, cu un caso Avestruz di Gabinete Mike Eman den prison y otro caso posibel caso di Refineria di Aruba den man di Ministerio Publico mientras e rapport Bo Aruba cu ta papia di e abuso mas grandi di placa di Aruba den historia, si a keda documento cu no por a persigui.
Pero durante e debate 2021 na television, e picanan di Mike Eman a wordo pordona. Aruba a haya imagen di un homber cu ainda tin e curashi di bin papia di un futuro, cu lo a muri si el a keda na mando cu e maneho cu te awe ta cubri Aruba cu berguensa.
Cu un debate como instrumento democratico pa informa Pueblo prome cu eleccion por bira peligroso, a keda demostra na 2021 ora Mike Eman a haya oportunidad pa bin splica Pueblo kico e ta haci atrobe cu Aruba.
Hasta fantasmanan den vecindario di santana a sali na careda ora Mike Eman a papia di su maneho pa futuro, cu Evelyn Wever-Croes a scapa ora Mike Eman a bay sconde pa su berdad!
