Gobierno Wever-Croes no ta corta cu 5 Miyon den Cuido Medico

Mientras Gobierno di Reino di acuerdo pa Aruba ricibi 181 Miyon mas na asistencia - *Den encuesta 54 porciento ta considera Wever-Croes ganador di e debate electoral - *78 porciento di participante na encuesta ta sostene e Acuerdo Aruba y Hulanda

ORANJESTAD (AAN) — Faltando un siman pa eleccionnan pa Parlamento di Aruba, tanto Pueblo di Aruba como Gobierno di Reino a expresa nan mes riba e maneho cu a wordo hiba dor di Prome Ministro Evelyn Wever-Croes.

E posicion di Gobierno di Reino enfrente Aruba, a bini dilanti durante e reunion ayera ora un decision mester a wordo tuma si lo pone e sumanan acorda den e acuerdonan di 2020 na e gobiernonan di Aruba, Curacao y Sint Maarten.

Segun e lista di decisionnan e Gobierno di Reino Hulandes ta satisfecho cu e forma cu Aruba ta cumpli cu loke a wordo acorda, loke no ta e caso cu e paisnan Sint Maarten y Curacao.

E hecho cu Aruba ta cumpli cu e acuerdo a haci cu Aruba por spera pago di 181 Miyon pa e tercer trimester di 2021 pa loke ta trata asistencia financiero di Hulanda.

Esaki ta nifica cu hasta den tempo dilanti eleccion, Gobierno di Aruba ta tene su mes na loke el a acorda cu excepcion di e exigencia pa corta den gastonan di AZV cu Cinco Miyon.

Informacionnan cu DIARIO a ricibi despues di e debate ta indica cu Gobierno no ta di acuerdo cu e exigencia aki. Na parecer di Gobierno Wever- Croes, Aruba unicamente por corta alrededor di Dos Miyon.

Gabinete Wever-Croes lo ta traha riba otro solucion, loke ta nifica cu un e proximo gabinete mester tuma e decision final.

Pueblo di Aruba di su parti Diahuebs cu un mayoria abrumador a sostene e maneho cu ta wordo hiba dor di Gobierno Wever-Croes segun e encuesta di Camara di Comercio despues di e debate cu nan a organisa Diahuebs.

E encuesta ta demostra un sosten total di Aruba pa Gabinete Wever-Croes riba 54 porciento a considera cu a gana e debate, sigui cu 13 porciento pa AVP, 8 porciendo pa Accion 21, 7 porciento pa MAS.

78 porciento di personanan cu a participa na e encuesta, ta tras di e Landspakket cu a wordo acorda na 2020 entre Prome Ministro Wever-Croes y Hulanda.

Segun 86 porciento di personanan cu a participa na e encuesta, mester suspende candidatonan politico cu ta sospechoso di autoridad. Esaki ta un contesta directo di Pueblo sigur den e caso di Benny Sevinger, cu ta na disputa den mundo politico.

67 porciento di personanan cu a participa na e encuesta no ta di acuerdo pa privacidad di votadonan wordo kibra loke ta encera cu e mayoria di votado no ta di acuerdo pa nan informacion cay den man di partidonan politico.

Asina nan ta sostena e decision di Prome Ministro Wever-Croes pa no permiti pa partidonan politico haya e lista aki.

Por considera cu un siman prome cu eleccion, Prome Ministro Wever-Croes ta haya sosten di tanto di Gobierno di Reino como di Pueblo di Aruba.