Marisol mester enfrenta Pueblo pa loke ta trata tereno Cas di Madushi

Kico tabata destinacion di e erfpacht y a sigui cumpli cu e destinacion aki?  -  *Ta ora Marisol tabata Ministro na 2005 a haya Recht van Erfpacht te 2065? - *Prome cu eleccion votadornan mester wordo informa dor di Marisol

ORANJESTAD (AAN) — Democracia no ta permiti ningun duda den e forma cu politiconan ta atende cu exigencianan di ley ora nan ta ocupa un puesto publico manera e funcion di Ministro.

Informantenan ta mustra DIARIO cu mester exigi Marisol Lopez-Tromp pa bini dilanti y duna contesta riba tur pregunta cu por tin habri riba e asunto di e tereno di e Cas di Madushi.

Segun informacionnan cu DIARIO a ricibi y ta bini dilanti de prueba cu ta wordo presenta awe, na 2005 tempo cu Marisol Lopez-Tromp tabata Ministro encarga entre otro cu Infrastructura, e terenonan aki a wordo duna den erfpacht pa un periodo te 2065.

Segun informantenan si esaki ta berdad, mester bini un splicacion awe, pakico erfpacht mester a wordo regla pa  tereno pa e ruman di Marisol, Lelicia Tromp, cu ta candidato riba lista di MAS tambe.

“Marisol mester duna Pueblo splicacion cu e debe Pueblo for di momento cu el a uza placa di Pueblo di Aruba pa traha e brug pa cas di su madushi,” informantenan a insisti.

Nan ta mustra riba e overeenkomst pa tereno cu a wordo alcansa dia Prome di December 2019 pero cu dentro di seis luna mester a wordo hancra den un acto di Notaris.

Pues tabata tin seis luna pa e asunto wordo regla, pero tabata Prome di Juni di 2021, cu e documento cu DIARIO a publica anteriormente a mira luz.

“Tin un regla cu un Ministro no ta atende asuntonan pa su famia,” informantenan ta trece dilanti. Nan ta mustra cu den e caso aki Marisol a actua na interes di su famia pero na mes momento den un tempo record mientras Miles di Arubiano tin hopi tempo en espera di un tereno sumamente necesario.

Importante sigur ta bira pa ta conoci pa Pueblo di Aruba, kico destinacion oficial di e terenonan aki ta y si te awe a tene na e destinacion aki.