Un analisis di Evelyn Wever-Croes como Prome Ministro di Aruba ta conclui - *Cu un coalicion carga cu problema politico, el a dirigi e barco Aruba - *Sin placa y sin economia el a dirigi Aruba den un turbulencia mundial
ORANJESTAD (AAN) — Durante practicamente tres aña, “Analisis” a bira e rubrica cu analisa pa DIARIO e sucesonan y desaroyonan mas importante a base di exigencianan periodistico.
E solo hecho cu DIARIO a haya rason den e guia cu el a duna Aruba, ta duna prueba cu no ta a base di deseo di uno of mas miembro di redaccion di DIARIO, e columna aki ta mira luz pero a base di investigacionnan profundo di materia cu un manera of otro, a keda scondi pa comunidad di Aruba.
Esaki sigur tabata e caso den asunto di e refineria Citgo, cu Aruba a mira te na 2018 como e gran milager cu lo a presenta su mes pa trece abundancia pa Aruba, mientras DIARIO mester a enfrenta Aruba cu e berdad, cu Citgo tabata fantasia.
No tabata facil pa convence Aruba, cu e momentonan cu e pais tabata baila di 2009 pa 2017, berdad di Aruba tabata amargo. Ta cu rapportnan y hechonan concreto, DIARIO a coregi e mundo di fantasia cu casi a destrui Aruba.
Awe ta cu hermentnan legitimo mester analisa e Gobierno cu ya ta demisionario, cu ta e Gobierno maneho pa mr. Evelyn Wever-Croes.
Hermentnan cu ta cuminsa cu e barco cu mr. Evelyn Wever-Croes mester a maneha, e gobierno cu e mester a dirigi, pa goberna Aruba.
Despues cu AVP na forma exclusivo a haya oportunidad pa forma Gobierno, na 2017 Mike Eman como lider di AVP, cu a gana eleccion, mester a bolbe forma Gobierno.
Na 2017 sinembargo, Mike Eman mester a forma un coalicion y a nenga di forma un Gobierno pa mas bien desaparece for di panorama politico di Aruba.
Evelyn Wever-Croes mes a forma un coalicion cu partidonan chikito, cu politicamente no tabata facil, manera tempo tambe a demostra.
Ta den esaki e capacidad mas grandi di Evelyn Wever-Croes como dirigente y lider di e pais a bini dilanti.
Cada bez cu problema a presenta, el a actua cu un coalicion cu a wordo manca ora Daphne Lejuez a dicidi cu e no por ta parti mas di e Gobierno cu como Miembro di Parlamento e mes a yuda mira luz y a sigui sostene.
Lejuez a cambia resultado di eleccion y a aumenta oposicion pa baha e sosten den Parlamento di Wever-Croes cu mayoria cu razon a pensa, cu lo no sobrevivi e temporada di gobernacion.
E forma serio cu Prome Ministro Wever-Croes a dirigi su gobierno, a sigura cu no tabata tin e tormentanan cu hopi y sigur oposicion a spera.
Gruponan di protesta contra cualkier decision di ministro di cualkier color, tabata haya atencion di Prome Ministro Wever-Croes cu a busca solucion.
Aruba a conoce un lider na momentonan dificil pa loke ta trata desaroyo politico pero tambe den un situacion cu e pais no tabata placa pa fiesta mas y mester a tuma medida.
Evelyn Wever-Croes no a practica mentira pero a tuma medida. El a papia palabra cla cu Aruba ora belasting a subi pa paga e debenan cu Gobierno Mike Eman a laga atras. El a papia palabra cla ora e mester a exigi Citgo entrega Aruba placa. E mester a negocia esaki pasobra, manera DIARIO a proba, e contracto cu Eman a firma cu Citgo tabata na interes di Nicolas Maduro.
Den un pandemia a yega na un acuerdo cu Hulanda pa awe Aruba por sigui cana den un futuro cu no ta e futuro cu Aruba tabata tin, ora Evelyn Wever-Croes a tuma mando di e pais.
Awe analisando e trabou di Evelyn Wever-Croes, cu ya a cambia futuro di Aruba cu mester sigui traha pa e generacion nobo por desaroya su mes cu tur exigencia di un pais democratico, den e columna “Analisis” ta wordo conclui cu pa bienestar di Aruba, mr. Evelyn Wever-Croes mester bolbe despues di eleccion pa continua cu e trabou cu el a cuminsa na 2017!
