Gobierno tin plan pa cu varios ‘Dagopvang’ pa Adultonan mayor

Minister di Salud y Asunto Social Wyatt-Ras:

ORANJESTAD (AAN) – Den entrevista cu Minister di Salud y Asunto Social, drs. Mervin Wyatt-Ras, a declara cu den e plan di Gobernacion di Gabinete AVP-Futuro, nan tin un parti special pa e adultonan mayor.

“Mi ta encarga cu e Ministerio pa Asuntonan di Adulto Mayor, y hunto cu e departamento pa Adulto Mayor, nos kier duna forma na henter locual ta bay sosode riba e area aki, cual ta maneho, proyectonan y locual nos kier logra.

Nos mester di tur actornan, di tur e departamentonan y entidadnan p’asina nos traha hunto pa logra nos metanan. Por bisa cu nos a inicia, y e Departamento di Ouderzaken a wordo lanta a base di e Ley di Verzogingshuizen, na aña 2016-2017, den Parlamento, y aki ta importante cu bo tin diferente entidad pero tambe cu ta necesario pa tin un entidad cu ta take care tambe di asuntonan di nos grandinan” Minister Wyatt- Ras a bisa.

E minister a reitera cu asina aki e departamento aki a inicia, despues cu e Ley a pasa y aworaki ta un Departamento riba su mes, y gobierno ta hopi contento cu ne.

El a subraya cu no solamente ta traha na concientizacion, pero e posibilidad pa nos adultonan mayor cu por cierto, 27.2% di nos poblacion ta riba 60 aña, cu ta un grupo grandi, pa fortifica cu nos grupo di adulto mayor por keda mas tanto na cas.

Pasobra aworaki, tin diferente cas priva cu ta duna cuido, tambe tin SABA cu tin mas of menos 200 pashent, anto tin eyfo den casnan di cuido unda mas of menos 300 persona ta keda, y tin esnan cu ta keda na cas.

“Mi mes experiencia di cuida mi mayornan ta cu mi ta ripara cu nan tabata contento te na momento cu nan a cera nan wowo. Mi ta kere esey nos kier pa nos adultonan mayor, crea tambe facilidadnan y tin caba esun di Cruz Cora, na San Nicolas, pero tin un na Playa, y ta bay construi un na Paradera of Piedra Plat segun mi, p’asina haci posibel cu nos grandinan haya un “dagopvang”, pues cu nan por bay keda eynan durante dia, anto anochi drumi na cas”, e dignatario a señala.

Di e manera aki e no ta afecta e yiunan, cu no tin cu kita for di trabao pa cuida nan grandinan, pero nan por keda den un lugar den dia. Ras a menciona, por ehemplo, Centro Kibrahacha, cu ta haciendo un tremendo trabao, pero e no ta un “dagopvang” e ta mas tanto un lugar pa actividad.