Otmar Oduber di PPA ta bati alarma:
- Gobierno ta den silencio total
ORANJESTAD (AAN): Como parlamentario di PPA, Otmar Oduber ta vocifera su preocupacion tocante 7 aña di desaster y ningun solucion, poniendo salud publico na riesgo, particularmente e habitantenan di Mahuma, Cas Paloma, Parkietenbos y vecindario, como e turistanan cerca di Bubaliplas door di un crisis di maneho di desperdicio.
E areanan aki ta testigo di negligencia y silencio total di gobierno, unda cu e maneho di desperdicio, incluyendo ‘medical waste’, no ta hayando atencion urgente y transparante di gobierno. Esaki ta mustra cu gobierno y e minister en cuestion ta simpelmente iresponsabel. “Nos ta creando un time bomb kibou na Ser’i Teishi. E holor ta insoportabel y e habitantenan tur ta kehando, pero no ta haya oido. E zonanan aki ta treciendo risico serio pa salud publico,” Oduber enfatisa.
Core sera dump sin soluciona e problema realmente: Segun Otmar Oduber, Ser’i Teishi tabata un proyecto di solucion temporario na 2018. Intencion tabata cu e lo ta pa 2 pa maximo 3 aña, p’e no bira un peliger permanente, manera ta e caso aworaki. E tempo ey ex minister Ursel Arends, a core sera dump na Parkietenbos y pone un muraya bunita y hopi costoso, pero eyden actualmente tin 46 container sera y 8 container habri yena cu ‘medical waste’, sin control, sin respet pa salud di nos comunidad.
“Tur hende ta laba man. Gobierno ta keto keto. Y e barionan eybanda cu su hendenan ta sufri tur consecuencia,” Oduber a expresa.
Incinerator boycotea na 2018: “Nos tur corda con e tempo cu ami tabata minister y a bin cu e solucion di incinerator, pero dos parlamentario a para fuerte contra esaki, ya cu nan tabatin nan propio agenda.” Otmar ta recorda cu e tempo cu el a bin cu e proyecto di incinerator den Parlamento, nan a dicidi di par’e, paso supuestamente incinerator no ta bon pa Aruba. Otmar a referi specificamente na un parlamentario cu wordo cumpra y hasta mester a bandona partido MEP e tempo ey y e otro parlamentario cu tabata kier pa e ley di cannabis pasa, pero a dicidi pa no sostene e proyecto di incinerator, ya cu e no a haya su kier.
Te dia di awe e ley di maneho di desperdicio ta na Parlamento y Otmar un biaha mas, a bolbe haci peticion pa bin trat’e den Parlamento, pa asina Serlimar por haya e fondonan necesario pa por atende cu e desaster aki, prome cu algo pio pasa. E tempo ey hasta PAHO a indica bon cla, cu gobierno mester atende cu e situacion aki y pa via di dos parlamentario, cu tabatin nan agenda personal, nos no a logra keda cla na 2018.
Suma misterioso di 240 Miyon: Oduber tambe tabata bringa pa haya transparencia riba e suma di 240 miyon. Un suma misterioso di 240 miyon florin, cu nan a menciona pa henter e maneho di Waterzuiverings installatie na Bubaliplas. Pero cu awor e gobierno actual a hasta para e destaho di esaki. Segun Oduber, e situacion por ta resolve cu un suma hopi mas rasonabel y via e fondo di emergencia di ATA, considerando cu 70% pa 80% di e sushi ta bin di e hotelnan y condominionan den cercania. “Nos a propone un solucion cu tabata realistico y urgente. Pero nan a nenga e peticion completamente. Nunca mi tabata di acuerdo cu turista mester paga $20,- pa Aruba atende cu su maneho di desperdicio. Sinembargo tanto e habitantenan como e turistanan na Aruba ta pagando prijs halto, cu por afecta hasta nan salud propio,” segun Oduber.
Turismo na riesgo: Na e zona di Bubaliplas, e waterzuiver installatie ta manda awa contamina na lama. Oduber a combersa cu varios di e hotelnan, restaurantnan riba beach y condominium den cercania, unda cu e turistanan como e trahadornan ta keha masha hopi mes di e holor toxico cu ta reina.
Ta di lamenta cu e restaurant- y hotelnan y condominiumnan no por sigui cu e situacion aki, mientras cu turismo ta e pilar di nos economia y awor ta exponi na un riesgo di salud innecesario.
P’esey mes fraccion di PPA ta manda un carta urgente na gobierno pa un Reunion Publico y ta exigi cu Parlamento mustra liderazgo den e crisis aki. E situacion ta serio, urgente, y no por warda mas, specialmente cu reces ta na caminda.
“Nos mester pone Aruba prome. Prome cu reces, Parlamento mester exigi solucion y accion.Keda sin haci nada y bira cara otro banda no ta un opcion mas,” Otmar Oduber a finalisa bisando.
{gallery}Seri Teishi, Parkietenbos, Bubaliplas ta un time bomb cu pronto lo explota{/gallery}
