Parlamentario Rocco Tjon:
ORANJESTAD (AAN) – Den entrevista cu DIARIO, Parlamentario di fraccion di MEP, Rocco Tjon, a splica tocante e sistema di “Bodycams” cu a pensa di bin cu ne, pa agentenan di KPA.
Parlamentario Tjon ta referi na esaki pa loke ta trata seguridad di cada polis. “E intencion cu nos tabata tin pa bin cu ‘bodycams’ ta pa e seguridad di e agente policial. Dus, esey tabata e meta su tras, y cu ta bay actua, ya un bez cu nan sa cu agente policial tin ‘bodycams’, sigur cu e parti di falta polis respet, lo bira menos. Pero di otro banda, si nos kier takel e parti social mi ta kere cu nos mester sigui fortifica e fundacionnan cu mi ta kere tin un rol hopi importante pa mitiga e aspecto aki.
Esaki ta e motibo di con nos a laga haci investigacion cientifico pa for di muchanan caba, nos sa kico ta e retonan di mas grandi pa nan. E investigacion aki a wordo presenta algun siman atras den sala di Parlamento tambe, pa tur parlamentario ta na haltura di e investigacion aki”, Parlamentario Tjon a indica.
A base di e investigacion aki a scoge seis fundacion pa aloca mas fondo pa nan. Rocco Tjon a bisa cu di e forma ey por atende cu e parti social miho. Consecuentemente, esaki ta bay tin un efecto positivo pa e parti hudicial tambe.
E parlamentario ta lamenta, en todo caso, cu a scoge pa no otorga e seis fundacionnan concerni, e tres miyon florin adicional, cu sin duda ta di balor agrega.
