Gobierno ta pone enfoke riba prevencion y deteccion trempan di cancer di pecho

Man den man den solidaridad:

ORANJESTAD (AAN): Ministerio di Salubridad, Asunto Social, Cuido di Adulto Mayor y Maneho di Adiccion a organisa un encuentro di solidaridad na Bestuurskantoor den cuadro di luna di conscientisacion di cancer di pecho. Como parti di e encuentro, Bestuurskantoor a wordo ilumina den color ros como señal di solidaridad cu tur persona y famia afecta pa cancer di pecho.

   E iniciativa a pone atencion riba prevencion, deteccion trempan, acceso na informacion y e importancia di sosten durante e proceso di cancer.

   Minister Wyatt-Ras: E luz ta refleha atencion pa hende!  Durante su discurso, Minister Melvin Wyatt-Ras a pone enfoke riba fortalesa, resiliencia y sosten. Segun e Minister, ora un persona ta enfrenta cancer, apoyo di famia, comunidad, profesionalnan di salud y diferente instancia ta esencial pa sostene e persona durante e proceso y contribui na su bienestar y calidad di bida.

   Minister Wyatt-Ras a splica cu e iluminacion di Bestuurskantoor ta carga un mensahe cu ta bay mas leu cu e color ros.

   “E luz ros cu ta ilumina nos Bestuurskantoor no ta solamente un luz briyante; e ta refleha nos atencion pa cada persona cu cancer ta toca: esun cu ta enfrenta e diagnosis, esun cu ta lucha, esun cu ta vence, esun cu ta recupera y esun cu ta sostene y cana banda di dje durante henter e proceso.”

   E Minister a conecta e iniciativa cu e mision di e Ministerio pa sirbi ciudadano den cada fase di bida y contribui na bienestar fisico, mental, emocional y social.

   El a enfatisa cu prevencion, informacion, screening y deteccion trempan ta parti importante di e agenda di salud. E prioridad ta pa sigui traha riba un sistema di cuido mas accesibel, caminda e ciudadano por haya informacion, orientacion y yudansa na tempo.

   Minister Wyatt-Ras a agrega cu Gobierno tin un responsabilidad importante y cu colaboracion cu diferente profesional di salud, fundacion, institucion y otro partnernan ta indispensabel. E cooperacion aki ta esencial pa fortalece cuido y sosten na comunidad.

  Den e contexto ey, e Minister a reconoce e contribucion di Fundacion ABO den prevencion, incluyendo e programa di screening BOB. El a menciona nan trabou pa acerca screening y orientacion na comunidad y a expresa sosten pa e campaña Make Aruba Pink – Haci Aruba Ros, cu ta motiva e hende pa tuma accion pa nan salud. “Laga e luz ilumina tambe nos conocemento.”

   Dr. Vanessa Williams: “Screening ta salba bida”.  Manera ta conoci, Dr. Vanessa Williams, radiologo y cofundador di Stichting BOB Aruba, a papia riba importancia di pasa di conscientisacion pa accion.

   E programa BOB pa screening di cancer di pecho a wordo inicia pa Stichting BOB y awo ta forma parti di Fundacion ABO.

   Dr. Williams a splica cu e programa ta existi 10 aña caba y cu e campaña Make Aruba Pink di e aña aki ta uza e color ros como un yamada pa tuma accion. “Detecta trempan por salba bo bida.”

   Dr. Williams a enfatisa cu conscientisacion tocante salud di pecho no mester cuminsa solamente ora un muhe yega edad di screening. El a splica cu for di edad di teenager, mucha muhenan por cuminsa examina nan propio pechonan aproximadamente un biaha pa luna, pa siña conoce nan curpa y reconoce loke ta normal pa nan. Asina, si un cambio presenta, nan por nota esaki mas facilmente y busca ayudo na tempo.

   Segun Dr. Williams, for di 45 aña screening cu mammogram ta wordo haci cada dos aña. Su yamada na muhenan eligibel tabata cla: no warda, busca informacion y haci bo cita. Su mensahe final tabata directo:  “Screening ta salba bida.”

   Premier Mike Eman: Prome Minister Mike Eman a comparti e experiencia personal di su famia ora su casa, sra. Doina Eman, a enfrenta cancer y a pasa door di tratamento.

   El a papia tocante e impacto cu un diagnosis di cancer por tin no solamente riba e persona afecta, sino tambe riba su famia y esnan cu ta cana banda di dje durante e proceso. E Prome Minister a pone enfoke tambe riba e importancia di sosten emocional, presencia y solidaridad, y a recorda e apoyo cu su famia a ricibi durante un periodo particularmente dificil.

   El a expresa tambe su profundo aprecio pa e profesionalnan di salud cu a brinda cuido na su esposa durante su tratamento.

   Su relato a reforsa e mensahe cu, banda di tratamento, e persona cu ta enfrenta cancer mester por conta cu comprension, presencia y sosten.

   Minister Wyatt-Ras a expresa aprecio na sra. Doina Eman pa su fortalesa durante su lucha contra cancer y na Prome Minister Mike Eman pa e sosten cu el a brinda su esposa durante e proceso. E Minister a indica tambe cu experiencia di personanan cu a pasa door di cancer y di nan famianan por aporta conocemento practico cu por yuda Gobierno y comunidad sigui mehora e sosten cu ta wordo brinda.

   Gobierno ta reafirma su compromiso pa sigui fortalece prevencion, acceso na cuido y sosten na personanan y famianan afecta pa cancer.

   Cu e iluminacion di Bestuurskantoor, e mensahe di Minister Wyatt-Ras tabata cla: e cas di pueblo ta para man den man den solidaridad cu esnan cu ta enfrenta cancer, esnan cu ta recupera y esnan cu ta cana banda di nan durante e proceso.