Gobierno di Aruba a regala Famia Real un obra di watapana

ORANJESTAD (AAN): E mata Divi Divi (Watapana) ta e compas natural di Aruba, e mata semper ta mustra den e direccion zuidoost debi na e biento cu ta bin di noordoost.

E ta e simbolo di resiliencia di e Arubiano y e ta un muestra cu Aruba nunca ta rindi pero cada biaha cu bin retonan nobo, ta enfrenta esaki cu hopi curashi.

            Dialuna atardi, e Famia Real a bishita Museo Industrial na San Nicolas anto eynan por a mira con Aruba a desaroya su mes y con despues di cada contratiempo Aruba ta lanta bek y sali mas fuerte for di esaki.

            Riba e dedicatorio ta bisa: Biento a forma e mata aki, pero su raiznan ta hopi profundo y hopi fuerte, asina tambe e forsa di lucha di e pueblo Arubiano.

            E obra cual ta baña den oro, a wordo traha pa Ciro Abath kende ta un artista local cu ta aplica diferente sorto di tecnica, mayoria biaha e ta uza inspiracion historico. E tabata 30 aña meneer di scol y tin varios obra di arte di dje riba nos isla. Entre otro e obra di arte di brons riba Plaza Padu, airport y na Banco Central.