Bola di cristal di Fondo Monetario Mundial ainda ta nubla
- Guera na Ukraine ta keda factor determinante pa futuro
- Menos inflacion den menos crecemento economico normal
ORANJESTAD (AAN)- E pronostico economico pa 2023 di e Fondo Monetario Internacional, tabata e documento tan spera pa splica mundo kico por spera di situacion financiero, economico y asina social mundial.
E rapport manera DIARIO tambe a anuncia, a mira luz cu despedida di Januari 2023 pero no ta duna e claridad completo cu mundo a spera.
Mas bien contenido di e rapport ta mustra cu e desastre financiero y economico cu tabata wordo spera na 2023, ta parce di a bira un menasa menos serio pero na mes momento e Fondo Monetario Internacional ta mustra con cualkier momento, problema grandi por bati na mesa atrobe.
Pa por presenta contenido di e rapport na un forma responsabel mester comprende e palabranan cu a wordo uza den e documento.
Textualmente e Fondo Monetario Internacional ta trece dilanti cu “Inflacion mundial lo baha na 2023 y 2024 den un crecemento economico subpar”.
Esaki ta nifica cu e inflacion, e causante di prijsnan cu a subi manera fli den biento na 2022, lo ta menos na 2023 pero no necesariamente pasobra economia mundial a recupera completamente.
Crecemento economico mundial lo cay menos cu a wordo spera na October 2023. Segun e cifranan nobo e crecemento mundial proyecta lo ta 2.9 porciento compara cu 3.4 porciento na 2022 y lo subi cu 3.1 porciento na 2024.
Tanto e forma cu paisnan a atende cu nan taza oficial di interes den e lucha contra inflacion como e Guera na Ukraine, ta keda importante pa actividad economico.
E hecho cu China a bolbe habri su portanan economico ta importante den e formulacion di e peso di inflacion cu mundialmente ta wordo spera di baha cu 2.2 porciento na 2023 pa alcansa 6.6 porciento y seguidamente bira 4.3 porciento na 2024, loke lo nifica cu na 2024 sinembargo, e lo keda riba e cifra prome cu Covid-19 a bati na porta.
E medaya cu a keda presenta den e rapport di Fondo Monetario Internacional, tin otro banda. Inflacion por bolbe conoce aumento y pues prijsnan mundial por bolbe subi si e situacion anhela no wordo alcansa.
E resultadonan economico di China ta hunga un papel. Pero sigur ta importante kico lo pasa den e Guera di Ukraine.
Paisnan na e momentonan aki, segun e relato di Fondo Monetario Internacional mester tuma medidanan pa alcansa un bon maneho financiero y monetario. Den su proximo edicionnan DIARIO lo presenta e exigencianan cu lo tin pa paisnan, cu mester evita cu cambio di clima ta trece mas problema y inverti mas den energia limpi.
E rapport claramente ta mustra cu na e momentonan aki por tin optimismo pero cu tin trabou pa wordo haci den un situacion mundial, cu no ta brinda ningun seguridad pero mas bien ta bati alarma cu situacion por bolbe conoce cambio negativo.
