Gobierno a tuma e pasonan necesario pa prepara pa e desaroyonan rond mundo a consecuencia di e “trade war”

Minister Geoffrey Wever a informa Parlamento

ORANJESTAD (AAN):  Dialuna merdia Minister di Finansa, Asunto Economico y Sector Primario Mr. Geoffrey Wever a presenta den Parlamento di Aruba pa duna un actualisacion completo na Parlamento tocante e efectonan di e  “trade war” mundial,  incluso e tarifanan impone pa Merca recientemente, e desaroyonan geopolítico actual y e posibel impacto cu e desaroyonan aki por tin regionalmente y riba e economia di Aruba.

            E panorama economico mundial a cambia despues cu e anuncio di Presidente Trump di dia 2 di april, cu a introduci tarifanan halto cu tin su repercusionnan global. Apesar cu Aruba no ta un blanco directo di e medidanan aki, e consecuencianan indirecto por ta importante y preocupante si no atende cu nan debidamente.

            Minister Wever a remarca cu gobierno a tuma tur e pasonan necesario pa prepara pa e desaroyonan cu ta tumando lugar den mundo a consecuencia di e “trade war”. Analisis haci di e cifranan di turismo, crecemento economico, inflacion pa Aruba, reserva di devisa, crecemento di cuponan di trabao, finansa publico di Aruba y buffers financiero door di expertonan y instancianan local manera Banco Central di Aruba (CBA), Oficina di Turismo (ATA), Departamento di Asuntonan Economico (DEZHI) y Directie Financien, ta indica cu na e momento aki no tin niun motibo pa pánico, y cu Aruba ta prepara pa si a acaso tin consecuencia negativo pa Aruba.

            A prepara algun escenario unda cu a calcula cu si e entrada di turismo ta baha cu cierto porcentaje kiko e impacto lo ta y kico Aruba por haci. Di e análisis haci door di e expertonan y e realidad económico, financiero y turístico na e momento aki, e conclusión ta cu na e momento aki no ta premira un impacto negativo cu Aruba no por maneha.

            “Na e memento aki no tin ningun motibo pa panico, Aruba ta un pais solido, su economia ta solido, e producto turistico ta solido, e maneho financiero economico di e pais ta solido tambe, dus nos ta den un bon posicion, pero mester keda monitor e indicadornan, pa si bin un cambio negativo nos por adresa esaki na tempo, locual nos por, pasobra nos sa unda nos ta para y kico nos mester haci den caso di un crisis”, minister Wever a termina bisando.