Aruba a firma acuerdo di aviacion cu Suisa

Minister Cicilia kier mira mas turista for di Europa

ORANJESTAD (AAN): Recientemente un delegacion di Aruba a biaha pa Suisa caminda a topa cu Federal Office of Civil Aviation (FOCA). E meta di e biahe tabata pa concretisa acuerdo cu Departamento di Aviacion Civil di Aruba. E biahe a duna su resultado mirando cu a logra firma un acuerdo importante cu Suisa. Ta trata aki di un acuerdo bilateral di transporte aereo.

   A firma un acuerdo di “Open Skies”. “Open Skies” t’un acuerdo bilateral hopi habri y sin restriccion riba e cantidad di vuelo entre ambos pais. Cu e acuerdo aki, awo ta posibel cu Aruba por ricibi vuelo for di Suisa. Esaki ta parti di e vision y maneho di Minister di Turismo, mr. Wendrick Cicilia caminda ta sigui inverti pa eleva e producto Aruba y awo cu destinacion nobo. E ta alinea tambe cu e pensamento di e ‘airlift committee’ y e trabaonan cu Oficina di Turismo di Aruba ta desplegando na Europa.

   E delegacion di Suisa tabata consisti di Christian Andres como hefe di delegacion, Laurent Noël y Roza Sikon. Di otro banda, e delegacion Rubiano tabatin Edwin Kelly na cabes di e delegacion hunto cu Maritza Evertsz y Albert Boekhoudt.

   Tanto e Oficina Federal di Aviacion Civil di Suisa como Departamento di Aviacion Civil di Aruba a constata cu ambos instituto ta alinea den pensamento y di e forma di traha. E alineacion den pensamento a conduci cu e deliberacion- y encuentronan a bay den un ambiente sumamente ameno y productivo. Despues di algun siman di negociacion, a logra yega na otro. A firma e acuerdo di ‘Open Skies” riba 16 di juni ultimo.

   Minister di Turismo, mr. Wendrick Cicilia ta sumamente orguyoso cu a concretisa e acuerdo aki. A mandatario a expresa cu lo sigui haci esfuersonan pa expande y modernisa e red di acuerdonan di transporte aereo di pais Aruba. Tipo di acuerdo asina ta di suma importancia pa garantisa un ‘airlift’ continuo por diversifica nos turismo.