Gobierno a informa oficialmente cu St. Maarten tin nada di haber cu e candidata pa Miss World

Con un hende na Guadeloupe por a manda Lara Mateo pa representa St. Maarten...

PHILIPSBURG: E certamen di Miss World 2021 cu mester a tuma lugar Diahuebs anochi cu a pasa en vivo for di Puerto Rico, a wordo posponi debi na un problema serio cu Covid-19, y a haci esaki for di punto di bista di salud y interes di seguridad di e concursantenan, y di tur hende cu ta den organizacion.

   Un total di 23 di e 97 candidatanan a test positivo pa Covid-19.  Candidatanan cu a confirma cu nan a haya Coronavirus ta Malaysia, como tambe Indonesia.  E biaha aki, Aruba no tin candidata den e certamen aki.

   Pero e sorpresa di mas grandi ta, ora cu diripiente hendenan na St. Maarten a bin ripara cu tin un candidata representando e isla, y nan no sa mes kende e ta.

   Esey a bira mas serio, ora cu Parlamentario Christopher Emmanuel a trece e asunto aki dilanti Dialuna siman pasa den Parlamento, y a pasa parti di un video di dje pa demas gobernantenan mira.

   Den e video por mira un mucha muher identificando su mes como Lara Mateo, cu ta bisa cu e tin 24 aña di edad, ta papia tres idioma cu ta Frances, Ingles, y Spaño, y su profesion ta un Rental Management Assistant.

   Lara Mateo ta bisa den e video cu el a nace na Spaña, y ora cu e tabatin 1 aña di edad su mama a dicidi muda bay biba na St. Maarten y nunca mas a bandona e isla.  Lara ta bisa cu e ta feliz di yama esey como su cas.

   Aki e Parlamentario Emmanuel a mustra preocupacion: “Kende ta doño di e franchise di Miss World pa St. Maarten?  Con e candidata aki a wordo escogi?  Tabatin un certamen organiza na St. Maarten, y si ta berdad, unda y ki tempo?  E kier sa si St. Maarten Tourism Bureau tabata envolvi den asunto di presupuesto y sponsor di dje.

   E kier a haya sa kende a duna permiso pa e candidata aki representa St. Maarten y bay cu e bandera.  Nan kier hasta sa si acaso e persona aki ta un habitante legal di e isla.

   Pueblo di St. Maarten mesora a cuminza puntra nan mes esaki.  Un di e organizacion profesional di certamen na St. Maarten, esta Posh Productions a bisa cu nan no a manda Lara Mateo pa representa e isla, pero a bisa cu nan a haya sa cu un persona independiente cu tin e licencia na isla di Guadeloupe, lo a scout Mateo.

   Pesey mes, e relato oficial ta cu Posh Productions cu tin e franchise pa Miss World St. Maarten a indica cu Lara Mateo no ta representa nan.

   Hopi hende a keda babuca y kier sa con ta posible cu un hende cu licencia independiente ta wordo permiti pa manda un candidata sin consulta cu e franchise holder oficial di e pais pa ta sigur cu e pais ta sostene e reina ey.

   Riba Diahuebs cu a pasa, Prome Ministro Silveria Jacobs di St. Maarten a informa Parlamento cu nan tambe a cuminza un investigacion pa haya sa con un hende di Guadeloupe a logra di registra un candidata pa representa St. Maarten.

   Gobierno di St. Maarten a manda un carta oficial na e organizadornan di Miss World riba e asunto aki.  Pero nan a bisa claramente cu Lara Mateo no ta autoriza, ni tin sosten di St. Maarten.  Nan a check cu Gobierno Frances tambe pa mira ta kico a pasa na Guadeloupe, e.o. cu nan Departamento di Turismo y tambe Departamento di Cultura.  Pero nan a bisa tambe cu nan sa nada di e candidata ey.  Pero un hende di Guadeloupe normal tin di bay Francia pa competi, y asina ta participa representando Francia, y no St. Maarten.

   Semper tabatin e pensamento cu e organizacion di Miss World ta uno hopi serio, pero loke a pasa aki cu e denuncia di St. Maarten, ta indica cu e proceso di screening di e organizacion a faya barbaramente.

   Mientras tanto, tur hende na St. Maarten ta sigui puntra nan mes, ta con Lara Mateo como un hende desconoci, a logra bay representa e isla?

   Awor e certamen a wordo posponi, y lo ser teni na un otro fecha dentro di 90 dia.  No ta conoci si pa e fecha ey, cu Lara Mateo lo tey poni keto bay como Miss World St. Maarten.   Te cu Diadomingo anochi ainda su potret ta poni oficialmente riba e website como representante di St. Maarten.