Reino mester a atende mas placa pa Aruba den lockdown Hulanda --- *Na Juli 2021 ya Hulanda a gasta 76 Biyon Euro na Covid-19 --- *Gobierno Hulandes actual por mara Gobierno Hulandes nobo??
ORANJESTAD (AAN) — Aruba ta drenta un siman sumamente importante. Siman di Pasco, cu a bira completamente diferente na loke tabata wordo pensa te cu un par di siman pasa.
Nos ta papia di diferente, pasobra e desaroyonan di Covid-19 a crea e pensamento cu na 2021 hende lo por a disfruta na un forma costumbra di e dianan di fiesta.
Esaki no ta posibel y Aruba mester biba den estado di alerta pa un posibel ola nobo di e malesa.
Aruba mester ta prepara riba tur tereno.
Na prome lugar, tur cu por a pensa cu nan kier bay pasa nan vacacion na Hulanda, mester tuma esaki atrobe na consideracion.
Ademas mester bati un alarma grandi pa Aruba cu manera den edicion di Diasabra nos a indica, mester baha for di nubia.
Hulanda na e momentonan aki ta den un lockdown. Su economia, su entrada a wordo afecta durante e temporada, cu ta percura pa mas entrada pa su negoshinan y pa e pais.
E forma cu Hulanda ta atende cu su situacion financiero, ta reconoci rond mundo. Hulanda no solamente ta conoci como uno di e paisnan mas rico na mundo, pero hustamente relaciona cu esaki, uno di e paisnan cu ta atende na forma mas serio cu placa.
E mentalidad Hulandes ta di un Pueblo, cu ta economisa.
Hulanda conoce cantidad di areglo social cu ta atrae tur hende pa Hulanda, pero na mes momento ta exigi sumanan halto di su pagadornan di belasting.
Prueba di belasting na Hulanda ta bini dilanti hasta cerca companianan, cu ta prefera di bay establece na otro pais na Europa.
Gobierno di Hulanda ta exigi bon pago di belasting loke ta nifica cu Pueblo di Hulanda ta exigi lo maximo di Gobierno.
Covid-19 tabata un peso enorme pa Hulanda, cu mester a tene na consideracion cu e no ta so riba e mundo aki.
Hulanda ta mara na Union Europeo tambe pa loke ta trata gastonan. Ayera Union Europeo mester a haci un pedido mas di booster pa su ciudadanonan. Mester paga, aunke tin lockdown y negoshinan Hulandes no ta produci.
Na Juli 2021 ya Hulanda a gasta un suma di 76 Biyon Florin na relaciona cu exigencianan di Covid-19.
Hulanda awe mester bolbe cuminsa cu asistencia cu el a stop mescos cu a pasa na Aruba ora e efecto mas pisa di Covid-19 a pasa.
Siman pasa Hulanda mester a atende asunto pa Aruba. Gobierno di Reino, cu ta Gobierno Hulandes y e Ministronan Plenipotenciario, mester a atende mas placa pa Aruba, na momento cu Hulanda mester a lockdown.
Tur sector na Aruba mester cuminsa realisa e seriedad di Covid-19 rond mundo y e efectonan cu e tin pa cumindad.
Gobierno Hulandes ta na careda. Esaki ta nifica cu Gobierno di Reino tambe ta na careda.
Companianan Hulandes ta den problema. Trahadornan Hulandes ta den problema. Ta drama tin na Hulanda.
Den un situacion di lockdown no por exigi ningun pais pa atende cu aprobacion pa baha e suma cu cual ta baha e salarionan di ambtenaarnan durante e dianan aki.
Sindicatonan mester biba cu e realidad aki.
Sinceridad na Pueblo di Aruba ta nifica cu ta haci Pueblo comprende, cu mundo ta den crisis. Hulanda tambe. Union Europeo tambe.
Dianan di fiesta ta dilanti di porta. Pasco, cu ta un tempo di refleccion tambe. Un temporada tambe di buena fe pa enfrenta 2022, cu un realidad cu ningun hende na mundo conoce pero si lo por baha salarionan mundialmente!
