ORANJESTAD (AAN) – Apesar cu tin hopi yobida na Aruba e ultimo lunanan di e aña aki, pueblo di Aruba no ta perde su FE y den e Misanan di Aurora e aña aki, tin hopi mas feligres presencial, compara cu 2020.
Tampoco e hecho cu tin e variante nobo ómicron, di cual no tin ainda hopi informacion tocante su forza y trascendencia, bon parti di e comunidad catolico ta asistiendo na e diferente Misanan pa participa den e Santo Sacrificionan di Misa, y por ripara cu hopi famia ta bay hunto tambe, y sea ta sinta paden, of ta keda pafo bao di tent, cumpliendo cu e protocol di tapaboca, distancia fisico y hand sanitizer, y incluso por a bolbe mira mucha chikito cu nan famia, como tambe personanan di edad avanza, cu ta bayendo Misa bek.
Esaki ta un cambio grandi compara cu aña 2020, cu e Misanan tabata basta bashi, pero ta hopi notable cu e vacunacion a haci un diferencia grandi, y como segun datonan oficial, mas 80 mil ciudadano a vacuna, y hopi a haya caba hasta e booster (di tres shot), e feligresnan ta sinti nan mes hopi mas sigur, pa nan participacion den Misa ta presencial.
Logicamente, semper ta keda un grupo cu ta keda cas wak e rito di Eucaristia via television, of scuche na radio, muy posiblemente pa motibo di salud of problema cu transportacion.
Ohala por retene e aumento di casonan di covid-19 pa Aruba habri aña cu hopi mas hende cu un grado di inmunizacion confiable, tanten cu cientificonan yega na e remedinan cu ta parce ta bay ta e solucion pa Covid-19 cual tin caracteristicanan di bay bira endemic, manera Influenza; y posiblemente, e manera pa sigui combatie lo ta un vacuna anual y/of remedinan oral.
