André Manzel Henderson ta trece exposicion poderoso: “The Journey”

ORANJESTAD (AAN) – Diseñador multimedia y artista Mericano André Manzel Henderson ta presenta su prome exposicion internacional,

titula “The Journey: A Visual Experience of the Transatlantic Forced Migration,” cu ta habri oficialmente riba 12 di juni 2025 na museo historico Fort Zoutman den centro di Oranjestad.

            E exposicion profundamente personal y visualmente impactante ta e resultado di casi 15 aña di exploracion artistico y historico. Henderson, kende a studia African American Studies y a traha como diseñador grafico y di paña, a cuminsa pinta despues cu un amigo a ofrece su studio den Atlanta durante un zomer, hunto cu canvas y pintura fresco. “Mi a yama riba mi intuicion creativo y mi antepasadonan, y algo a bisa mi: ‘Pinta algo pa nos. Nos ta esunnan cu a bini prome cu bo y e motibo cu bo t’ey awo’”, Henderson ta relata.

            Loke a cuminsa como un acto creativo espontaneo a cambia den un tributo na e miyones di Africano cu a perde den e trayecto di e Middle Passage, esunnan cu nunca a logra yega na riba Caribe of Merca. Su serie The Journey ta honra esunnan na traves di obra visual—hopi di nan ta figura femenino, representando e origen di bida.

            E exposicion ta inclui casi 30 obra, un combinacion di tres serie poderosamente conecta, incluyendo The Clotilda—nombra segun e ultimo barco di catibo conoci cu a yega Merca. Un parti di e obra ta pinta riba palo, tipo Georgia Pine, pa refleha e material original di e barconan. Un otro serie ta presenta obra di 8 pia halto cu simbolonan Africano y Cristian, cu ta capta e lucha spiritual y resistencia di e catibonan.

            Despues di explora hopi luga den region, Henderson ta sinti cu Fort Zoutman ta cuadra perfecto pa su nificacion historico cu e tema di e exposicion. “E espacio ta conecta cu e historia—cu kico e forti ta representa y kico e ta nifica pa e comunidad. Mi kier pa e exposicion ta accesibel y valioso pa pueblo di Aruba,” Henderson ta bisa.

            Cu raiz familiar cu ta bay bek na e isla di Montserrat, Henderson ta bisa cu para dilanti di lama na Aruba ta lanta un conexion spiritual mas profundo. “E isla aki, su tamaño y su hende, ta duna bo e sintimento di ta na cas.”

            E artista y organisadonan ta gradici sinceramente tur esunnan cu a yuda e exposicion bira realidad: Het Cultuurfonds Caribisch Gebied, Unoca, Vibration PR, Basha Foundation, VNO, y Museo Historico Aruba – Fort Zoutman. Nan compromiso cu intercambio cultural y dialogo historico a wordo fundamental pa trece The Journey na bida riba tera Arubano.

            E exposicion tambe lo presenta un serie mas chikito titula “The Last Voyage”, inspira pa e ultimo barco di esclavo cu a biaha pa Corsou. Ta explora posibilidad di presenta su exposicion na nos isla ruman y Hulanda tambe. “The Journey” lo ta habri na Fort Zoutman for di 12 di juni 2025. E publico ta invita pa bini experencia e coleccion emocional aki di cerca.