Privacidad ta ciudadanonan ta demasiado importante - ORANJESTAD (AAN): Durante e conferencia di prensa di Gobierno Dialuna, Prome Minister Evelyn Wever Croes a papia riba e proceso di votamento.
El a splica cu tur aña e partidonan politico ta pidi pa un copia di e registro di votadornan (kiezersregister).
“Den ley ta para cu un partido politico tin e derecho di pidi y haya dos copia die registro”.
Riba e registro tin para e nomber, e fecha di nacemento di e persona, e pais di nacemento, adres y na ki urna e ta vota.
Esaki ta regla den un ley, cu e meta cu e partidonan politico por controla identidad y por controla kendenan ta vota na cada urna, segun Wever Croes.
El a splica cu mientrastanto hopi pais a cambia e ley aki, cu excepcion di Aruba.
Segun e mandatario, mientrastanto tin desaroyonan mundial riba e derecho di privacidad, como derecho humano.
Esaki ta poni den un articulo di e tratado Europeo di Derechonan Humano.
“Mirando esaki, na Aruba mester elimina esaki tambe, pa no actua contra di e tratado cu ta stipula cu cada ciudadano tin derecho riba privacidad, unda cu adres, fecha di nacemento etc. no mester cay den man di otronan, sin tin mester”.
Door di duna e kiesregister na un partido politico, e partido por haci cune kico cu e kier, unda cu e informacion di e ciudadano por wordo uza pa otro metanan, segun e Prome Minister.
El a indica cu pesey como minister encarga cu Asuntonan General el a busca y a haya conseho di Directie Wetgeving, Veiligheid Dienst Aruba, di e Conseho Supremo Electoral y tambe di Censo.
“Tur e consehonan aki ta riba un linea, esta cu e tratado articulo 8 di EVRM ta pone cu nos no por duna e kiesregister na partidonan politico, pasobra nos a mira caba den pasado cu e informacion a wordo uza pa otro cos”.
Esaki segun e mandatario, kende a sigui bisa cu e ley no ta duna e oportunidad pa duna e kiesregister, pa asina un partido politico por manda carta pa un ciudadano.
Esey no ta e meta di e ley, ni tampoco pa e partidonan politico bay na cas di e ciudadanonan y insisti pa e bay vota, of haya sa unda el a nace, of sa ken ta biba cu ken ta cua adres.
https://diario.aw/categories/noticia/general/gobierno-a-dicidi-di-no-duna-partidonan-politico-e-kiesregister#sigProId5f9cc08d63
“Nos ta para pa privacidad di e ciudadano y nos a tuma e decision pues cu nos no ta duna e kiesregister na partidonan politico”.
Dos partido a pidi pa e registro AVP y MEP y ambos a wordo nenga.
Unda cu partido MEP ta compronde y respeta esaki, AVP a protesta y a bay te na Gobernador, segun Wever Croes.
