DIARIO nunca a bandona su investigacionnan riba e traicion mas grandi di Aruba - *Citgo Aruba lo a sirbi base Comunista na Venezuela despues di eleccion Maduro - *Na Cuba Mike Eman y Nicolas Maduro a regla refineria pa interes Comunista
ORANJESTAD (AAN) — Na 2018 DIARIO a realisa uno di e maniobranan mas grandi den su historia cu tabata e forma cu el a deshaci di e fantasia di Citgo, cu Gobierno Mike Eman a introduci pa hinca Aruba den un fantasia economico, cu mester a sirbi e interes politico di Mike Eman directamente.
Na momento cu Aruba a bay eleccion na 2013, ya Aruba tabata den problema serio cu Mike Eman a logra sconde y pa cual e tabata busca un solucion mas ainda sabiendo cu Hulanda tabata na punto pa pone fin na autonomia.
E refineria cu Gobierno Henny Eman kier a desmantela y pa cual desmantelacion ya a cuminsa traha rapportnan, na 2013 tabata e posibilidad pa Mike Eman scapa su cara.
E buskeda di un partner pa e refineria a cuminsa y a culmina na Cuba, caminda Mike Eman a topa cu Nicolas Maduro pa asina e proyecto di refineria di Aruba a mira luz.
Na 2016 Mike Eman a scapa su mes politicamente cu e proyecto refineria cu el a introduci y cu mester a habri su portanan na 2018.
Nicolas Maduro a bisa for di e prome momento cu e lo tin un refineria mas, pues un interes mas, den region di Caribe. Mike Eman a pone Aruba baila sin splica Aruba e peligro grandi nacional cu el a crea.
Rusia como gigante Comunista tabata y ta e gran sosten financiero di Venezuela, cu tabata propietario di Citgo cu Chavez kier a bende pero Maduro kier a conserva pa por a haci prestamo pa e haya mas placa pa gasta.
Na e momento Mike Eman tabata negocia cu Nicolas Maduro, ya autoridad Mericano a detene cantidad di persona mara na Citgo na Merca, cu autoridad Mericano tabata considera un centro di labamento di placa y otro crimennan.
Pio tabata e hecho cu Nicolas Maduro a percura pa Rusia haya forsa na teritorio Mericano y a entrega Rusia casi mita di Citgo como borg pa e haya placa. Di e forma Citgo a bira un poder di comunismo na Merca.
Na 2018 DIARIO a cuminsa bati alarma na Aruba pa motibo cu Aruba a wordo hinca den un situacion di peliger grandi dor di e proyecto Citgo, cu e grupo di Nicolas Maduro tabata kier a uza como centro nobo di actividadnan di Citgo, pero asina tambe di Venezuela y di Rusia.
2018 mester a nifica e apertura di e refineria di Citgo na Aruba, cu asina lo mester a bira centro di operacion di Citgo, despues cu Merca a saca grupo Nicolas Maduro for di Merca na 2017.
2018 mester a marca e momento cu Venezuela lo a vota pa un Presidente y ya Pueblo tabata contra Nicolas Maduro, cu mundo henter a bisa cu el a falsifica eleccion.
Merca ya a cuminsa cu persecucion criminal di e grupo Maduro, relaciona hasta cu negoshi di droga.
Den e planificacion entre Aruba y Citgo, e refineria di Citgo lo mester a habri su portanan na 2018, ora Nicolas Maduro oficialmente a bira Dictador y barconan y avionnan di Rusia a drenta region di Caribe, caminda den porta di Aruba un base militar Ruso lo a wordo habri.
Si Citgo tabata den man di Nicolas Maduro y a habri su portanan na 2018, e refineria di Aruba lo a bira instrumental den sigura combustibel pa Rusia na mes momento cu Nicolas Maduro lo por a trapa riba medidanan economico di Merca pa pone fin na dictadura y e problemanan cu te awe ta presente na Venezuela.
E proyecto Citgo na Aruba a nace na Cuba, a bira realidad cu Venezuela pero lo a sirbi interes di Rusia directamente.
DIARIO lo sigui informa Pueblo di Aruba cu tur detaye despues cu for di 2017 Mike Eman ta sconde pa su berdad!
