Gobierno a activa ‘Taskforce’ pa centro di ciudad

Revitalizacion di Oranjestad:

• Edificio di ex-The Music Box ta simbolisa cambio importante 

ORANJESTAD (AAN): Gobierno di Aruba, hunto cu diferente instancia manera Departamento di Naturalesa y Medio Ambiente (DNM), Bureau City Inspector, Dienst Openbare Werken (DOW) y Cuerpo Policial Aruba, a organiza un encuentro cu prensa na e ex edificio di Music Box den Elleboogstraat pa comparti progreso y siguiente pasonan den e revitalisacion di centro di Oranjestad.

   E momento aki ta forma parti di un vision mas amplio pa duna bida nobo na Oranjestad, transformando espacionan cu anteriormente tabata bandona of deteriora, den areanan funcional, sigur y atractivo pa comunidad y bishitantenan.

   E iniciativa aki ta basa riba e establecimento oficial di un taskforce interministerial bou e titulo “Convivencia: Centronan di Ciudad Sigur y Humano”, crea pa medio di un ministeriële beschikking como parti di e implementacion di politica di gobierno pa 2025–2028.

   E taskforce tin como obhetivo principal desaroya y ehecuta un strategia integral pa fortalece siguridad, convivencia, calidad turistico y habitabel den centro di Oranjestad y San Nicolas. Entre su responsabilidadnan tin coordinacion di accionnan social, preventivo y di siguridad, manera tambe desaroyo di un plan di accion pa periodo 2025–2027.

   Como parti di e structura formal, a nombra e siguiente miembronan di e Taskforce: (*) Ramon Arnhem (asigna pa Ministerio di Asuntonan General), (*) Mauro de Koning (asigna pa Ministerio di Finansa), (*) Gerald Vingal (asigna pa Ministerio di Husticia), (*) Jose Paula (asigna pa Ministerio di Infrastructura), (*) Noreen Vingerhoedt (asigna pa Ministerio di Asuntonan Social), (*) Nicole Lugo (asigna pa Ministerio di Turismo).

   E miembronan ta representa diferente ministerio clave, sigurando un enfoke interministerial y coordina pa atende retonan di siguridad, convivencia y desaroyo urbano.

   Ademas, e Taskforce tin e posibilidad pa traha hunto cu partnernan externo manera organizacionnan social, sector priva y stakeholdernan turistico, pa asina logra un enfoke integral y sostenibel.  Dentro di e marco aki, autoridadnan di siguridad, incluyendo Korps Policial Aruba, ta hunga un rol clave den implementacion di accionnan concreto pa mehora orden publico y siguridad den centro di ciudad.

   E ex-edificio di Music Box, situa den Elleboogstraat, ta un luga conoci den historia local. Den pasado, e tabata un punto importante pa musica, specialmente pa genero manera reggae y roots, y a hunga un rol den e cultura musical di Aruba.

   Den un momento posterior, e edificio a sufri daño significativo y despues a keda bandona pa varios aña. Durante e periodo aki, e lugar a bira un punto di preocupacion den e vecindario.

   Awor, e transformacion di e edificio ta simbolisa un cambio importante: di abandono pa oportunidad.

Segun Gobierno, e proyecto aki ta mustra claramente cu revitalisacion di Oranjestad no ta un accion individual, sino un proceso continuo basa riba cooperacion, sostenibilidad y compromiso cu comunidad.

Cu accionnan concreto manera esaki, Aruba ta traha pa crea un centro di ciudad cu ta mas sigur, humano y atractivo, respetando su historia mientras cu ta construyendo su futuro.