Raad van Advies a anuncia cu Ley di HOFA ta contra Constitucion di Aruba

Critica pisa di Raad van Advies

• Articulo 38 cu Hulanda a introduci tempo di Gobierno AVP di 2014
• Gobernantenan di AVP-Futuro cu diripiente un defensa infantil 

ORANJESTAD (AAN): Tabata Diahuebs cu Raad van Advies su conseho riba e Ley di Reino HOFA a wordo publica, y den e conseho aki por mira claramete cu RvA cu ta duna conseho riba tur ley, ta bisa cu e Rijkswet di HOFA ta contra Constitucion di Aruba, pasobra e ta contene Articulo 38 den dje, cu ta indica cu “Aruba no por cambia nada di ley local cu ta trata supervision financiero, y solamente si Hulanda duna aprobacion, e ora Aruba por cambi’e.

   Protocol di 2014 caba: Ley di HOFA ta algo cu no ta di awor, e ta datando di 2014 for di tempo cu tabatin mal maneho financiero di Gabinete Mike Eman.  Ora cu e Gobierno di Eman a haya un KB e aña ey, a cuminza negocia cu Hulanda con pa kita e curatela financiero di Mike Eman.  Asina a bin na un acuerdo cu ta bin cu Ley di LAft cu a drenta na 2015, cu un protocol atacha na dje cu “no por cambia ley di LAft tanten cu Hulanda duna aprobacion”.  Esaki ta un protocol di AVP hunto cu Hulanda traha na 2015.  Esey ta algo cu Den Haag nunca mas kier a laga los di dje.

   Ora cu ex-Prome Ministro Evelyn Wever-Croes a firma e Bestuurlijkakkoord na 2024, atrobe Hulanda a insisti pa pone esey aden, y Aruba mesora a bisa cu no ta di acuerdo cu esey, pasobra e ta contra Constitucion.  Pero terkedad di Hulandesnan a pone cu el a bin aden.  Ademas loke a firma na 2024 no tabata algo cu no ta mara (‘bindend’), sino un intencion pa sigui negocia, incluyendo e punto aki tambe.

   Wever-Croes a indica cu e Bestuurlijkakkoord aki el a firm’e lomba contra muraya, na momento cu Aruba no tabatin placa... momento cu no tabatin manera pa e isla por sobrevivi.  El a firma pa Aruba por sobrevivi y tin cuminda pa come, y e ta para su tras.  El a firma publicamente y tur hende por a mira su firma.

   AVP-Futuro firmando scondi: Pero contrario na Gobierno actual, cu a bay ancra esaki den un ley, enbes di negocia pa nan bah’e for di mesa y lag’e, sabiendo cu e ta contra Constitucion y toch a lag’e eynan, y mas bien a ankr’e dos biaha mes, esta na Augustus 2025 a bay di acuerdo cu ne, y awor na Maart 2026 a bay di acuerdo cu ne den Conseho di Ministro di Reino.

   Awor e conseho di Raad van Advies a explota den cara di Gabinete Eman, mustrando cu e Ley di HOFA ta contra Constitucion di Aruba!

   Anto e Ministro encarga cu Reino a sali y bisa cu “... ta Evelyn a firma...”

   Ex-Prome Ministro Evelyn Wever-Croes mesora a reacciona, bisando cu tur loke el a firma ta transparente, ta habri pa publico mira, contrario na Gobierno di AVP-Futuro ta firma y ningun hende sa kico nan a firma.

   El a agrega cu gobernacion responsabel no ta djis potret cu palabra bunita, pero e ta cu hechos y transparencia.

   “Tur loke mi a firma den mi trayectoria di Prome Ministro di Aruba ta den pleno luz di dia.  Tur cos el a splica cu transpariencia.  Principalmente tur loke el a firma semper e meta principal ta pa proteha y defende Aruba su autonomia y soberania.  Ami no ta haci cosnan scondi, ni firma asuntonan scondi, pasobra mi firma tabata keda mantene porta habri pa sigui negocia.  E firma tabata pa sigui na mesa pa sigui negocia pa yega na algo miho pa pais Aruba, y no pa mara futuro di e isla na forma scondi.”

   Awor ta importante pa corda cu e curazon di democracia no ta discuti riba dje riba social media, pero tin di discuti esaki den Parlamento.  E ta reta Ministro pa bay den Parlamento pa debati, pasobra ta eynan den Cas di Pueblo, mester debati pa trece punto dilanti y comunidad mester mira tambe e representantenan duna cara, y no riba social media.

   Un invitacion ta bay na tur gobernante cu awor ta opta pa pone informacion riba social media, of a dicidi na firma documentonan scondi, pa bay Parlamento y debati cara-pa-cara, cu argumento y no cu insinuacionnan infantil.

   Aruba no ta pidi pa scondemento, pero cu kier lidernan cu tin curashi pa defende e decision pa cada uno a tuma, y unda e ley a wordo traha, den Parlamento.