Gobernador a pasa bishita Kinderhuis Imeldahof

ORANJESTAD (AAN): Stichting Kinderhuis Imeldahof riba diaranson 20 di october 2021 a ricibi bishita di Gobernador di Aruba, Alfonso Boekhoudt.

   Na su yegada, e directora Natalia Hernandez y coordinador pedagogico Denise Campbell a ricibi Gobernador Boekhoudt.

   Stichting Kinderhuis Imeldahof su meta ta pa ofrece un hogar temporal y guia pa muchanan cu, pa diferente motibo, no por biba den nan propio cas. Den mayoria caso e muchanan ta keda na un di e casnan di Stichting Kindherhuis Imeldahof te ora cu nan por reuni cu nan propio famia of te ora cu nan haya un famia di criansa.

   Gobernador a bishita tur e cuater casnan di Stichting Kinderhuis Imeldahof. Na Cas Marijke, Liliana Kwidama (hoofdleidster) a duna Gobernador Boekhoudt un recorido. E cas aki ta un centro di estadia habri 24 ora. Seguidamente na Cas Margriet, unda cu ta ricibi e muchanan durante di dia, a duna Gobernador un presentacion di con un dia den bida di un alumno ta.

   Despues a bishita Cas Irene, unda cu Gobernador a combersa cu dos alumno di e Fundacion. Finalmente Wendy Croes (hoofdleidster), cu tin 41 aña den servicio di e Fundacion, a conta tocante Imeldahof di antes y awor. E recuento aki a tuma luga na Cas Beatrix, cual ta un crisis-opvang habri 24 ora pa dia.

   E potretnan ta cortesia di Gabinete di Gobernador Aruba.