ORANJESTAD (AAN): Diamars ultimo Minster Endy Croes a reuni cu Sindicato SIMAR, un reunion di seguimento riba e topico di instructornan di landamento, sra. Josephine Abertus, hunto cu sra. Carol Boekhoudt y otro representantenan a atende e reunion aki.
Minister a indica cu e reunion a bay ameno y hopi amplio na unda cu Sindicato SIMAR a mustra gratitud pa e prome paso logra pa cu e problematica di instructornan di landamento. Den e prome 30 dia Minister di Enseñansa y Deporte Endy Croes den su funcion como Minister a haci tur esfuerso pa resolve parti di e problematica aki.
E instructornan di landamento tin 20 aña of mas cu tin un contracto di trabou, cu cada aña mester firma y renoba esaki, pa cual Minister di Enseñansa saliente a kibra esaki y a hibe na un forma di un “ovo contract”, na unda ta perde tur nan derecho y tur nan primanan.
Minister di Enseñansa y Deporte Endy Croes a sigui splica SIMAR cu a manda pidi un conseho di DRH y a ricibi tambe un conseho positivo “oplossingsgericht” cual a bini na bon ordo y a logra esaki den un tempo relativamente corto.
Despues di esaki Minister Endy Croes a bay Ministerraad pa draai bek e Ministerraad Besluit di 6 di augustus, di e forma aki aloca tur e instructornan di landamento bou di DPS, un departamento cu ta resorta bou Minister di Enseñansa y Deporte.
A percura pa un presupuesto pa nan por ricibi nan pago y asina aki DPS a “voer” nan in den nan sistema di un contracto “arbeidsovereenkomst” hayando tur nan primanan bek y nan por cuminsa ricibi nan pago dia 24 di october proximo.
SIMAR tambe a trece un punto di preocupacion; con ta bay sigui padilanti y regla esaki na un manera structural y sostenibel pa futuro.
Minister Endy Croes a splica SIMAR cu punto number 3 di e conseho di DRH, ta splica cu Directie Onderwijs y DRH lo sigui reuni den e proximo lunanan nos dilanti pa bin cu un parti con pa structura esaki y di Ministerio di Enseñansa y Deporte lo agrega un persona den e ekipo. Un otro punto tabata e pensioen, como cu nan tin contracto di un aña nunca por a wordo cera.
Minister Endy Croes a sigui splica cu tin sentimento pa nan preocupacion, berdad ta cu Gobierno na aña 2012-2013 a bin cu un ley di pensioen, pero laga nos no mira patras pero sigui traha pa bay padilanti. Minister a agrega cu e ta en espera di un conseho tambe con lo por reconoce esaki, pa motibo cu no ta solamente e instructornan di landamento, pero tambe pa tur contractnan di Gobierno y Gobierno mester duna ehempel den esaki.
Otro punto treci dilanti ta cu nan ta sinti cu nan tin derecho riba “vastedienst”, Minister a sigui splica cu na e momentonan aki Gobierno tin hopi presion di Hulanda, landspakket, COHO, ley di Reino, caminda cu tin un protocol firma di BVP ”Beleids verlagende Personeel” cu ta haci esaki poco dificil, pero cu a mira un “window opening” si, caminda cu e ley di contabilidad ta duna Gobierno e oportunidad pa firma contract te cu 5 aña, pesey Minister no ta compronde cu durante 20 aña y mas a firma contract di 1 aña.
E mandatario ta bay papia y purba na convence esnan responsabel y Gobierno pa firma y haci extension pa 5 aña, asina nan tambe por yega na por ehempel nan auto, lening y tin un mihor porvenir, esaki ta un promesa cu Minister Endy Croes a pone riba mesa y ta bay traha pe. Sra Josepine Albertus di Sindicato SIMAR a expresa cu a keda hopi contento con bon e reunion aki a bay.
